許廷鏗同易服男同居？林欣彤：係我私竇

歌手林欣彤（Mag）到電台宣傳最新EP《我們都是這樣長大的》，其中兩首歌更是由她自操刀，她表示靈感源自於之前的八卦新聞：「《金剛圈》呢首歌講生命中好多嘢都要原諒，曾經我好唔原諒自己，加上自己掛住唱歌，當嫲嫲（身體）衰退得最緊要時，我反而陪得佢最少，但事後諗番，佢都唔會想我陪佢一齊衰退。」

錄音後連發幾日噩夢

她提到嫲嫲經歷中風，現在已不能說話，問到可會播這首歌給嫲嫲聽？Mag說：「會播畀佢聽，尋日我先有呢個想法，之前我係播粵曲，佢會跟住唱，有時探佢，佢都會擘大眼。」她又自爆在錄音時相當感觸，回到家後更發噩夢：「嗰幾晚都發夢，夢入面我係咁喊，幾日都係咁。」

接受唔到自己醜樣

她提到最希望可以舉辦賣飛的個人演唱會，又表示日前與公司其他同事拍片宣傳時，以「醜女Look」示人：「拍咗段自己都唔敢睇嘅片，全部人都扮到好醜樣，唔想睇番，成世人最接受唔到。」

同易服男老友鬼鬼

提到好友許廷鏗（Alfred）被指與易服男、關心妍的助手阿小同居，Mag代為解畫指該大圍單位是一位共同朋友的住所：「我都成日上去，識咗三年，呢家人有對孖生BB，好黐我，次次上親去都成班人。我同阿小都好Close，佢會畀好多意見我哋，我好小聽人講嘢，係佢先可以說服到我，係個好珍惜嘅朋友。（有傳係佢哋嘅私竇？）咁呢個都係我嘅私竇。」

上過許廷鏗屋企

問到會否相信Alfred與阿小同居？Mag說：「唔信，因為Alfred屋企都唔喺度，我去過兩次佢屋企，同過佢阿爸食飯，佢阿爸係吹水天王，講嘢好勁，又會上去拍片Jam歌。」