落選贏星途 牛雜妹奇迹成「神」之路

20150626
東網電視
更多新聞短片
Monnie自爆最鍾意張智霖,仲話想親手煮碗牛雜麵畀對方食。

一年容易又港姐,除了參選佳麗10A女狀元麥明詩(Louisa)CV輝煌外,最受爭議的莫過於話題之女、現年22歲的元朗「牛雜妹」Monnie!當日首輪面試,Monnie在網誌發表感性千字文,一字一淚話「以牛雜妹為榮」,心口掛個「勇」字一心諗住入娛樂圈,網友讚她有別一般港女,完全冇公主味,無添加性格成就「牛雜傳奇」,是絕種好女仔,因此升呢成為「平民女神」!

蕭定一有意簽約

最新一期《好報》披露一夜成名的Monnie除了被模特兒公司睇中外,自言最喜歡男神張智霖(Chilam)的她,據知Chilam的老闆蕭定一有意簽她一圓其夢想,造就「十月初五的牛雜」。致電蕭定一,他不諱言十分欣賞牛雜妹:「牛雜妹依家人人都識,好欣賞佢爽直,講嘢得體又叻,佢話以牛雜為榮,相當感人肺腑!」

想煮牛雜麵畀初哥哥

剛過去的父親節(21日),追訪Monnie一天「牛雜日誌」,提到偶像即滔滔不絕講Chilam:「圈中有個男神好想見,佢就係張智霖,佢好顧家、好錫老婆又好錫個仔,又靚仔又有成就,最鍾意佢套《十月初五的月光》,如果有機會,真係想整番碗牛雜麵畀初哥哥食!」

肯為牛雜放棄一齊

只要是假日甚至放工,Monnie就會落舖頭幫手,舖頭是她的「煮」場,十項全能絕對稱得上是家中及店舖的「10優乖女」,但10優背後,卻換來一雙粗糙的手:「我雙手都五勞七傷,一定唔係好標準女仔個啲手,偏粗糙,手指甲都留唔到,因為整牛雜執嘢可能會整到手甲,但自己唔係好專注呢方面,我又唔係拎個手指嚟見人,自己冇乜所謂,其實Gel甲我都係近排第一次整。」

一碗牛雜,養活Monnie全家,牛雜店是家中收入唯一來源,Monnie從沒為此感自卑:「呢份工作同其他打工仔一樣,係正當職業,怕乜畀人知。細細個放學,如果舖頭忙,我就會幫手。依家返咗工,但如果媽咪有時開到聲話休息,我哋(幾兄妹)會幫幾個鐘。我哋每日會重複去做呢樣嘢,係生活一部分,間舖開咗十年,一直如是。」

恨入娛樂圈唔稀罕賺「肉」金

勁希望入行的Monnie,面對娛樂圈的各種誘惑,已表明會潔身自愛,絕不會接受金錢上的肉體交易:「有聽過好多唔同前輩嘅意見,都有同我講要注意同小心啲咩。有啲嘢我一定會拒絕,呢啲Offer換嚟係錢,我唔會稀罕,爸爸由細到大都教我做人要腳踏實地去賺錢,我同爸爸都冇橫財命,抽獎又唔會有我哋份,靠自己努力同興趣去賺錢,先係安樂錢。可能有人會憑呢啲Offer有好多嘢,但呢啲嘢帶唔到落棺材。做人腳踏實地,搵嘅錢係開心,個人自然會開心!其實每一行都有潛規則,做好自己,保持良好態度,唔擺架子,總會有人欣賞你,畀機會你!」

男友要似我老竇

22歲女,Monnie卻不心急拍拖:「感情唔急得,欲速則不達,有時個Moment到咗,感情自然嚟。拍過幾次拖,屋企人都擔心,話我傻更更驚畀男仔呃,但我都幾幸運,除咗爸爸之外,幾個前度都幾錫我。」

想追Monnie的男士要聽住喇,其擇偶條件非一般:「細細個諗,如果第時搵老公、搵男友,要好似爸爸咁,好有安全感,唔會花天酒地。爸爸將佢所有時間心機都擺係舖頭同屋企,呢個一定係第時嘅偶像。」