功課寫全家「吔蕉」　李霖恩忍痛鬧囡囡

藝人李霖恩與囡囡李清宜以父女檔現身商場主題樂園活動。談到暑假將至，他透露本身想一家人到外地旅行，可是自己現時有兩套劇在手，十一月亦要演出舞台劇，故少了時間陪家人，此時身旁囡囡即謂：「我唔想爸爸拍劇，因為我想佢多啲陪我。」霖恩對此笑言：「嘥氣啦，你平時要媽咪，邊係要我？」之後他亦謂：「做嘢以外，都會盡量多啲陪佢哋，或者一齊出吓活動又可以賺錢，啲雜誌都話我父憑女貴，正呀！」

通頂拍劇搵銀

他又透露自己無份參與《愛．回家2》。問到故事可會完全不同？他則謂：「有啲關連囉。（驚唔驚觀眾唔接受新故事、新角色？）唔會嘅，佢哋過咗一排就ok。（自己冇份演出，會唔會唔開心？）我過咗啦，因為一冇咗查李施律師樓，我都唔開心！但過晒，因為之後都拍咗其他劇集。同埋依家都慣埋拍劇拍到通宵嘅生活，因為以前拍《愛．回家》好開心，番朝九晚七。」

培育囡囡做才女

問到暑假可會為囡囡安排興趣班？霖恩謂平時已為她安排很多興趣班，如溜冰、跆拳道、游泳、普通話，數學、小提琴等，故都希望她暑假可以休息。問到可擔心囡囡辛苦？而身旁的囡囡即坦言：「辛苦，因為得星期日同星期三唔使學嘢。」霖恩即笑言：「仲好呀，唔使畀錢佢學。畀你可以揀三樣唔使學，會揀咩？」將升小一的囡囡想了一會兒便說：「唔想學普通話，因為小學有得學。」問霖恩是否真的會不用囡囡上普通話？他就笑言：「唔學囉，好呀，慳番啲，不過真係好笑，細佬完全冇學呢啲，佢會自動攞本書嚟睇，同佢完全兩個性格，佢就好心散。」

仔女性格截然不同

之後，霖恩透露昨晚因功課問題而鬧囡囡：「佢成兩日都仲未做完啲功課，個周記又寫得求其，就咁寫『今天我和爸爸、媽媽、弟弟一起吃香蕉，晚上去了行商場』咁就完啦！所以就鬧佢。（有冇鬧到佢喊？）想喊囉，不過佢依家唔會架啦，佢面皮畀我鬧到好厚。（會唔會打佢？）細個會，依家好少。反而細佬就好乖，冇打過。」問到囡囡可會跟弟弟打架？她直言有，霖恩就謂：「依家冇打啦，不過都係佢打細佬，一定係佢打贏。」

唔怕中港股災

另外，講到今日恆指大跌，他謂自己沒有買股票，但老婆有。問到可擔心老婆「損手爛腳」？他則謂：「唔驚嘅，佢又唔係買得好大。（佢買幾多？）唔知呀，我嘅錢即係佢嘅錢，佢嘅錢就係佢嘅錢，不過我自己都唔係好識股票。」