翠如BB唔愛洗頭：頭油出出吓就唔出

藝人黃翠如為無綫節目《今晚睇李》錄影，透露會在節目中自爆家中秘密，笑言自細聽媽咪講「唔洗頭係好事」，故與姐妹均養成不洗頭習慣，中學時試過最長五日不洗頭，出埠更離譜，試過足足七日不洗頭，還笑稱「頭油出出吓就唔出」，今舖翠如BB「女神」形象真係一舖清袋！

問到男友有否投訴有異味？跟蕭正楠（Edwin）蜜運中的翠如笑道：「逢拍拖我就洗頭，冇拍拖就唔洗頭。（因為男友鍾意錫你頭皮？）因為怕陣味（攻）到人，呢個習慣Keep住都有，依家好多時唔鍾意洗頭，所以我都幾臭。（慳唔少洗頭水？）依家有代言唔使錢，所以洗頭水慳住咁用。」她又指現在每日洗頭很乾淨，故男友不會知道這個秘密，那新聞出街後怕否被嫌邋遢？翠如笑謂：「唔會，識咗之後會洗頭，之前我試過剪短頭髮，因為想留長頭髮，所以keep住成日洗，最多試過一日洗三次。」

翠如又直言Edwin乾淨得多，更自爆座駕與手袋甚凌亂，坦言曾遭男友「鵝」，她笑說：「佢成日問我幾時先想執車。（佢有幫手？）有試過，但好快就放棄。（咁邋遢驚唔驚嫁唔出？）唔關事啩，呢個係我性格，融入咗我度，冇計。（男友已接受？）我覺得係，因為佢依家見到我車籠，頂多畀一個表情再長嘆一聲。」