酷熱祭偶像　歌迷逼爆家駒墳

「年月把擁有變做失去…」Beyond樂隊的飲歌《光輝歲月》永記在歌迷心中，二十二年前今日，Beyond主音黃家駒從高台跌下來，跌碎無數歌迷的心。

今天是家駒廿二周年忌辰，在這個教人傷感的日子裏，家駒並不孤單，來自兩岸三地近百歌迷冒住攝氏30幾度高溫，聚集在將軍澳華人永遠墳場家駒的墓前，高掛家駒巨型紀念橫額，向偶像獻上鮮花，邊彈結他、邊大合唱《海闊天空》和《再見理想》等經典金曲。家駒，你聽到嗎？

廣西大拉隊來港拜偶像

來自廣西的劉先生今年第四年在網上發起《630香港活動群》，聚集一班大陸駒迷來港拜祭偶像，今年參與人數遠勝從前：「2012年得20、30人，今年已經有成百幾人，廣西最多人參加，企唔落，滿晒咁濟。我哋嚟上炷香畀家駒，當佢係親人一樣。」

遺憾Beyond三子未能重組

他提到將會與一班大陸歌迷到西灣河出席家駒紀念音樂會，讓港人知道有不少大陸歌迷仍然好想念家駒，而他們身上都穿起黑色的家駒紀念Tee，劉生表示每年都會特別設計一件新Tee。問為何會選用《情人》的歌詞印在Tee上？他說：「啲詞寫得好好，無論路有幾崎嶇，我哋對佢嘅愛都唔會變。」

他憶述在兒時只會買翻版卡式帶來聽Beyond的歌，直到互聯網興起，才開始了解偶像的「光輝歲月」。問可會希望Beyond三子重組？他說：「係人都想，但睇到新聞話佢哋唔重組，人生就係會有遺憾，唔可以凡事完美。」

河南少女死慳死抵來港

至於另一位隨團來港的河南少女宋小姐表示，今年第一次來港拜祭偶像，自小因聽Beyond的歌而練得一口流利廣東話。她強調並不富裕，全靠死慳死抵才儲夠錢來港「見」偶像一面。提到Beyond宣布不再重組，問可會感到可惜？她說：「就算再重組都同以前唔一樣，不如好似依家咁啦！」