江華帶同老婆麥潔文（Connie）齊齊出席《未來戰士：創世智能》首映禮，Connie直言自己是阿諾舒華辛力加粉絲，三十幾年前已有看對方的第一部戲。在旁的江華隨即自爆老婆還沒認識自己前去看辛力加時會感到非常寂寞，說：「佢話如果識咗我就可以一齊甜蜜咁睇，所以之後有阿諾舒華辛力加做嘅戲我一定同太太嚟睇，無論我鍾唔鍾意套戲。」

爆屋企成旅遊景點

對於已轉行賣保險的江華被問到生意如何，他就笑言：「生意依樣嘢真係講你都唔信，有人專登去我屋企搵我買，好感恩，感激大家的支持！嗰個人我唔識佢，嗰日我一出嚟，喺車度整緊嘢，佢走埋嚟話『江華哥、江華哥』，我就話有咩關照，佢就話『我嚟搵你』，我就話你搵我做咩我又無欠你錢，佢話『我可唔可以搵你幫你買保險』，佢嗰陣時就企我屋企出面。（啲人知你住邊？）依家全世界都知我住邊。」江華更揚言有旅遊人士當其住所為旅遊景點，曾看過有一男一女在自己的車旁邊不停自拍，又問別人江華是否住在這裏，對此江華笑言：「都好，造福人群，大家又多個景點。」

自嘲冇本事再拍劇

另提到無綫人才流失，很多小生花旦都離開，問到江華會否有意回巢幫手，江華謙虛表示：「邊有本事？咁多猛將，佢哋好多人。（有冇搵你傾過？）拍電視劇，都辛苦，但唔係嫌辛苦，冇咁嘅本事。（如果價錢好呢？）依，價錢大家可以傾吓，有商量餘地。（太太怕你太辛苦唔肯放人？）其實拍咗咁多年電視劇，除非遇到自己好鍾意。今日我返TVB做《今日VIP》，撞到汪明荃，佢問我幾時出返嚟拍劇，我就話我同你拍就得。不過係唱歌登台，唔係拍劇。（汪明荃真係會搵你。）佢實會，佢仲畀咗啲大戲飛我，話唔使錢，叫我去捧場。其實我同汪明荃冇合作過，只係上過佢主持嘅節目，我都想同佢拍，劇本好緊要，唔知消唔消化得起，拍電影好啲。（汪明荃都消化得嚟。）佢銅皮鐵骨，我哋係『打壞細佬』。」