撞破蜜會大隻男　林芊妤自爆經痛：冇下文

因殘廁Gathering一夜成名的林芊妤（Coffee），雖然事件令她與前東主無綫結束賓主關係。但不時以殘廁一事開玩笑的她卻反而工作多多，接到手軟。

成名後的她經常表示忙到冇拖拍，不過日前《東網》撞破她偷會大隻男，發現記者後向來敢言的Coffee自稱月經到，要趕回家，更揚言不會有下文。

大隻男幫拎戰利品

當日下午3時許，白色上衣襯短褲的Coffee和大隻男現身九龍行商場，穿梭名店的Coffee火速便有收獲，孭住一袋戰利品，大隻男再幫她拿着另一袋新鞋。

濕平後的Coffee與大隻男去戲院買飛睇戲，臨入場前男伴識做地帶她到小食部買飲品和食物，兩人親暱地並肩手指指揀不停，全程有商有量，及至回頭發現有記者，Coffee先是愕然，待定下神來即揮示好兼露出燦爛笑容，但身旁的大隻男不願上鏡，「9秒9」般即時彈開，但又不情願離「女友」太遠，只見他頻頻回頭望着Coffee偷笑。

稱大隻男做普通朋友

Coffee蜜會新歡被撞破，擔心再被追蹤的她說：「佢係普通朋友咋，約咗睇戲。」再問到睇完戲去邊，Coffee說：「冇下文喇！我M（月經）到唔係好舒服，睇完戲我要返屋企啦。」還叫記者不用跟隨，然後二人便匆匆入場。