王宗堯自爆同崔建邦係小學同學：同班㗎

藝人王宗堯（Greg）、唐文龍、歐錦棠及潘燦良到校園拍攝電台劇集，劇中飾演文青的Greg將早前劇中用到的書法分別送給其他三位演員，而歐錦棠亦即席揮毫，現場大騷寫書法的技巧，並邀請大家一同在書法上簽名。

Greg表示劇集內容講述香港1989年至2014年廿五年間的大事情，包括沙士及南丫島海難等，而他的角色在四位同學中年紀最輕，但最有抱負，問到是否有為劇集而練寫書法，他說：「冇㗎，其實係本身準備好嘅。我本身識寫，但字唔係特別靚，費事獻醜。」

提到中學同學，Greg表示自己最好的朋友便是在中學認識：「好多心事都會同佢分享，不過最近都少見咗，因為大家都忙。同埋呢行得一、兩個係同學，其中一個係Amigo（崔建邦），佢係我小學同學！（唔同級？）唔係，同班㗎！」當記者笑言Greg的外表較Amigo年輕時，他笑說：「佢向智慧高嗰方面發展。」他又謂曾有一段時間與對方有聯絡得較多：「嗰陣有諗過一齊搞電影嘅，後尾佢都繼續留喺TVB，同埋依家佢有自己嘅製作公司，希望有機會合作，當初我都有幫佢寫劇本嗰啲嘅。」