【錫面摸Pat】葉璇孖男友「蜜」遊傢品店

愛得如膠似漆嘅葉璇同「小默先生」，呢排成日公開晒恩愛。而呢對「糖黐豆」，呢日又喺北京大型傢品店度公然晒恩愛，除咗當眾玩純情手拉手之外，仲要玩埋摸pat同錫臉珠仔，真係齋睇文字都覺得肉麻。

紮起頭髮、化咗淡妝嘅葉璇，全程表現得相當風騷，而着衫着到開晒胸嘅小默先生，大部份時間都將手搭喺女朋友度，而同佢哋同行嘅，仲有葉璇嘅助手。佢哋三個人喺傢品店度四處遊走，對現場所有物品都好有興趣，包括床單、枕頭同埋盆栽等等。

情到濃時，小默先生唔單止親親女友，仲要公然摸pat，搞到路人甲、乙、丙嚇到眼都凸埋；難得兩位主角依然旁若無人，去到某個位又忽然興起玩純情手拉手兼嚟個深情對望，真係睇到人起晒雞皮。難得「電燈膽」助手全程就若無其事，好似覺得見慣不怪咁。