網民熱話：《爸爸去哪兒3》萌娃再現

內地綜藝節目《爸爸去哪兒》贏盡口口碑，每次節目一推出，即時引起網民熱烈嘅討論。而節目嘅第3季日前首播，對比起前兩季，今季節目事前甚具爭議，有人認為5個爸爸嘅知名度平均比前低，而且今次嘅小朋友採用4男1女，比例上面嚴重失衡等，但節目播出第一集後，大家都被活潑可愛兼且個性鮮明嘅小萌娃融化！

1.「最接地氣的混血兒」諾一

內地型男劉燁同法國嬌妻所生嘅寶貝仔諾一，擁有如小王子般精緻五官嘅佢一開口居然操一口流利東北腔嘅普通話，而且仲周不時會大唱《最炫民族風》等地道歌曲，此般衝突嘅混合體，因而被網友封為「最接地氣的混血兒」!另外，對比起老竇劉燁喺節目中cool到爆嘅形象，諾一經常搵話題同老竇傾偈，而且題材由觀音菩薩到電芯結構無一不可。今年只有4歲嘅佢，試過同劉燁好認真咁講：「幾年前觀音菩薩勸我，要跟你聊會天，然後就會給我好吃的糖﹗」對於諾一呢個鬼靈精，老竇劉燁當堂冇晒符！

2.「公主」夏天

另一位混血萌娃夏天（Poppy），係《爸爸去哪兒3》一眾萌娃入面唯一一位女生。自細擁有公主夢嘅佢長得十分標緻，烏黑嘅秀發、精緻嘅五官、甜美嘅笑容，一出場着住黃色公主裙嘅Poppy猶如童話故事中嘅小公主。但個性樂觀善良嘅小公主Poppy就一啲都唔嬌氣，喺節目中年紀最細嘅軒軒因為唔小心將麵粉撒咗成地時，大竣企喺一旁大笑，Poppy就嚴肅地同大竣講：「這有甚麼好笑的！」之後仲幫軒軒一齊執番啲麵粉，網友表示Poppy嘅表現真係冇得頂：「表現真的讓我眼前一亮！正直滿分沒話say！」

3.「霸氣總裁」胡皓康

今年7歲嘅胡皓康（康康）係一眾萌娃裏面年紀最大嘅大哥哥，就如老竇胡軍一樣，康康外表cool到爆，但內心卻熱情如火，佢喺節目中一見到有人受傷，就第一時間由背包拎出膠布畀對方，另外佢亦會主動幫手收拾現場用完嘅道具，更會幫弟弟諾一向村民拎食材，一個個成熟貼心嘅舉動，溶化晒觀眾嘅心，仲封佢做「霸氣總裁」！

4.「為食花癡」鄒明軒

今次年紀最細只有4歲嘅鄒明軒（軒軒），肥嘟嘟嘅身型加上一頭如「花師奶」嘅鬈毛造型，喜感十足﹗軒軒4歲之前嘅人生只有同身為拳王老竇鄒市明打打拳以及周不時食嘢填補空虛嘅肚仔。但自從第一次見到夏天小公主之後就拜倒喺對方嘅石榴裙下，從此世界就圍住呢位姐姐轉﹗見佢嗲聲嗲氣咁叫喚「姐姐」，十分搞笑﹗有網友表示軒軒依家嘅人生：「打打拳、肚子餓、找姐姐。」

5.「樸實善良」林大竣

內地資深演員林永健嘅仔仔林大竣嘅外表雖然冇其他萌娃般討喜，但個性單純善良嘅佢係5個小朋友入面最快交到朋友嘅一個，甚至喺好朋友諾一抽中最簡陋嘅房子時，大竣仲會邀請對方過去同佢一齊瞓。而且年紀細細嘅佢更繼承老竇林永健嘅口才，周不時喺節目中同老竇舌劍唇槍，笑料十足！