《六時代》你要知：史上最多39人中頭獎

如果中咗六合彩，最低獎金800萬，辭咗份工un un腳得唔得？

浩邦金融董事梁彥穎說：「咁就要睇你年紀有幾大，如果你年紀大嘅話，咁當然可以辭咗份工 un un腳，但如果你係後生就唔得，點解呢？畀啲數據你睇睇就知，4%回報、3%通脹、800萬要用30年嘅話，每個月只可以拎 $25000。咁如果你後生，800萬要用100年，每個月只可以拎 $6400。」

「如果你投資得好，每年回報率有8%，就會好啲嘅，咁800萬用30年嘅話你每個月可以拎到 $42000，咁如果你要用100年或以上，你每個月就可以拎到 $31000咋。」

而中得頭獎梗係想一注獨得啦，但正所謂運氣話嚟就嚟，有時幸運兒又點止一個喎。大家又知唔知道一期六合彩頭獎最多試過幾多注中？

王宗堯就話畀大家知：「答案係39注呀。喺97年7月5日嗰期香港回歸金多寶攪珠，合共39注中頭獎，每注派707,770蚊。雖然得嗰幾十萬，但香港回歸加埋中頭獎，呢個機會只得一次，夠晒紀念價值啦。」