藝人會考分數瘋傳 張繼聰澄清唔止5分

20150715
東網電視
更多新聞短片
藝人會考到底幾多分呢個Topic,真係好值得好奇。
中學文憑試(DSE)今日放榜,網民因而人肉起底藝人當年會考分數,其中一直被指會考得五分的張繼聰,接受《東網》訪問時澄清:「我當年係有十三分,但唔知點解網上會傳我得五分。我記得當年中文科有C,其它科都C、D咁囉,最後考咗入演藝學院。」
他更鼓勵一眾應屆考生謂:「呢個只係人生一個階段,每個人都有唔同嘅才能,分數只係其中一個指標唔代表全部,成功與否仲有好多元素,考得唔好一定有其他路行,考得唔理想就繼續努力。」同時又自嘲:「其實分數好似浮雲一樣,我都畀人誤會咗咁多年,所以分數真係唔重要,年青人要繼續向前。」
至於當年會考僅得一分的李彩華(Rain),近年在演藝圈發展相當理想,證明英雄果然唔使問出處。談到當年會考放榜情景,Rain表示:「我性格比較樂天,所以當時心情唔係有太大嘅落差,因為我知道自己盡咗力,讀書真係唔係求分數,而係需要喺讀書過程中有所得着。」她又勉勵應屆考生人生不是只有讀書一條出路:「考試只係一生中一個小階段,唔會因為個分數而斷定你嘅未來發展,反而應該喺呢個時候畀時間自己靜吓,諗一諗有乜嘢更適合自己未來嘅發展。」
而身為應屆DSE重考生的Donut成員Elise(陶嘉瑩),考獲了34分佳績!問到心水大學,她表示:「最想入嘅三間大學係港大、中大同科大!」提到讀書心得,佢表示用了很多時間溫書,並希望可以做大律師 :「心無雜念,比平常人用多啲時間背書溫習!公司都好支持我,工作方面都好遷就我去溫習,自己最想係成為大律師。」
今年有參與寫真戰的「舞界栢芝」陶枳樽,透露當年會考分數只有個位數,並謂:「因為我自小已立志做舞蹈員,所以冇咩心機讀書,大家唔好學我。不過我覺得,做人要有明確目標先至最緊要。」談到Elise重考勇奪34分,她即大表讚嘆謂:「嘩!好叻呀!人又靚,又有內涵。」
另外,《東網》亦為大家綜合咗網上流傳嘅藝人香港中學會考(HKCEE)分數,不妨睇吓有冇出人意表嘅成績!
女神組
李嘉欣(26分)、楊穎(13分)、鄧麗欣(12分)、周秀娜(6分)、楊怡(2分)
男神組
孫耀威(28分)、許廷鏗(21分)、黃宗澤(19分)、余文樂(重考10分,第一次7分)、林峯(9分)
才子組
森美(25分)、陳百祥(13分)、黃子華(12分)、黃秋生(5分)、杜汶澤(4分)
天后組
莫文蔚(27分)、蔡卓妍(15分)、楊千嬅(13分)、容祖兒(9分)、陳慧琳(4分)