贍養費訴訟　葉翠翠陪老公上庭：一齊面對

藝人葉翠翠陪新婚老公周曉東現身灣仔法院，就周與前妻贍養費訴訟出庭。翠翠與老公約9時許，坐七人車到達，手拖手行入灣仔政府大樓，被問到對官司有沒有信心？翠翠表示：「一陣再同大家講。」

翠翠與老公在上址逗留一個半鐘，於10點半離開法院，照樣手拖手示人，記者問兩人官司結果，翠翠向記者表示：「未知，因為我有啲尷尬，對方反對我入法庭。（第一次見老公前妻？）見唔到，對方喺另一個出口走咗。」

記者問周曉東對官司意見，他沉默不語。再問到他對前妻拒絕葉翠翠進入法庭有何意見，他再次搖頭不說話，翠翠於是代答：「佢好緊張，都係我答啦！下次上庭係9月，但我、我先生同律師嗰日都唔得。（官司係咪令蜜月延期？）旅行幾時都有得去，希望完咗件事先。呢件事令我覺得雖然打風落雨，但唔使驚，有事一齊面對，可以搵律師解決，呢個老公我冇揀錯。」說罷即在記者面前「Show Hand」，舉起與老公緊握的手。

她續稱：「都知老公之前為我受咗好大壓力，又病，要針灸。（煲番啲湯水佢補番？）我唔識煲湯，sorry！（下次都陪老公出庭？）係，最多喺房仔等。」說畢與老公登上七人車，翠翠臨閂車門前，亦有揮手跟記者講拜拜。