查小欣談楊鎧凝：別令小朋友面對不必要壓力

資深傳媒人查小欣到書展出席「贏在起跑線上？騙人！」講座，分享以她與兒子成長為題的新書，以及湊仔心得。獲好友楊諾思、陳慧儀、梁李少霞及黃宗澤母親等到場支持，慧儀更帶同19歲青春無敵女兒Minnie到場。

小欣透露20年來的湊仔經歷，甜酸苦辣樣樣齊，她說：「湊仔係一場馬拉松，依家好多人話贏在起跑線上，實情係利用咗啲家長，等佢哋去幫仔女報班。我係超級唔怪獸家長，我會同個仔講：『你唔讀書，唔關我事，人哋係笑你啫，唔係笑我』，等佢自己揀。」

她續爆兒子曾想入娛樂圈：「佢今年20歲，讀緊大學，佢舊年話想入娛樂圈，我問佢：『你叻唱歌、跳舞、演戲、作曲定作詞？』，佢話乜都唔識，淨係話娛樂圈係Easy money，我即刻灌輸佢知娛樂圈嘅辛苦，佢已打消念頭。」

問到她怎樣評論「美心妹妹」楊鎧凝（Celine）寫真集部份生活照，被防止虐待兒童會指令人感到不安，以及簽名會突然取消，她說：「我未睇過佢本書，但細路唔識評估後果，咁不如一切都低調處理，你諗吓當6歲小朋友一心諗住着靚靚出席簽名會，但你話佢知取消，對佢會係種打擊，而且依家好多人講嘢好尖酸，最好令小朋友不要去面對不必要嘅壓力。」