寫真惡評如潮　許嘉浩：我無計劃變性

本地形象指導「綠魔」許嘉浩（Karl）今年推出美妝電子書，下午在尖沙嘴出席活動，並獲前中國小姐柯嘉琪（Kiko）撐場。

撐電子書反應好

提到其電子書，Karl透露反應好好：「因為係光波upload，第一日已經有一千二百幾人download。（有無留意寫真反應？）有呀，我出電子書係方便人哋24小時download，喺唔同地方、唔同國家都可以，一有手機就可以download。上個星期喺唐貝詩生日會度，有百幾個新朋友，我就攞佢哋個電話嚟download我個app，因為咁啱去完書展去飲嘢，我就叫人攞個電話出嚟，人哋以為我問佢哋攞電話，其實我只係叫佢哋download我個app。書商嗰邊話我知第一日有一千二百幾人download，依個係真實數目，我無報大數話有幾萬本。」

唔介意網友惡評

至於有網友對其寫真惡評如潮，更有人提出叫Karl不如直接變性。Karl對此坦言有留意：「我覺得今次我出美妝書，啲人都會知，唔會放我喺其他另類嘅類型。每人有不同嘅言論，香港好好，有言論自由，講唔同說話有佢哋嘅自由。暫時目前、之後我都無計劃變性，男仔女仔都無所謂，我平時出街又唔會着到孔雀咁。」

Karl又揚言覺得在韓國、台灣等地的人接受能力比較高，身為形象指導的他覺得若連自己都不大膽去試新妝，很難說服其他模特讓自己做styling。

唔會於其他地方出寫真

問到會否有意去其他地方出寫真？Karl就說不會：「我近依2年都有去國內登台，8月15號又去台灣，唔會去其他地方出書，反而會出擴展版，去唔同地方進行文化交流。我又無做傷害別人嘅事。（逼人download app？）佢哋個mon無爆，啲人download完都無反感，無爆mon。」

有意孖羅霖合作

講到早前稱讚羅霖，問到會否有意與對方合作？Karl直言與對方曾在晚宴上見過：「見佢勇闖樂壇，有機會都可以，見佢寫真有不同嘅服飾，我同佢中間有共同朋友，佢又簽唱歌、做戲嘅公司，如果佢要落街買餸，個仔嘅衫，我都可以幫手形象設計。」

幫低收入人士補習

Kiko亦大讚Karl的妝容書：「我本書係sell藝術，用2D相去表達信息，同Karl係same same。佢係styling，無論男女、保守啲、新潮嘅妝，佢都要carry到，同埋應該要有創意。」Karl則大讚Kiko是有料之人，兩人更計劃做多些善事：「我哋會定期去深水埗，幫助低收入人士，幫佢哋補習。」