《蟻俠》帶挈李璨琛馮德倫成網民熱話

超級英雄電影《蟻俠》近日上映，除咗嗰張被稱為史上最慳皮嘅「極細」電影海報夠晒噱頭外，主角保羅魯特（Paul Rudd）嘅上位之路亦深深打動到一眾網民！十年人事幾番新，15年前曾接拍港產片《特警新人類２：機動任務》嘅保羅今次憑《蟻俠》成功彈出，可算係吐氣揚眉！

網友隨即回顧當年喺《特2》中，曾與Paul做過對手戲嘅馮德倫、李璨琛、Maggie Q等演員嘅發展路向，當初拍得最多戲份嘅馮德倫不時參與幕後工作，與好友吳彥祖於2012年合開「突圍電影製作公司」，投身電影幕後製作，有網民就留言大讚佢夠晒才華，幕前幕後一樣得：「演又得，拍又得，好有才華！佢永遠都係我男神！」

而另類型男李璨琛（Sam）喺呢十年入面亦由單身寡佬變成幸福人夫，於2012年與拍咗拖兩年時裝設計師梁志瑩（Pae）結婚，仲同兩個老死一同成立時裝品牌，分店遍及中、港、台三地，搞得有聲有色！有粉絲更直言，時裝界先係真正屬於Sam嘅地方：「佢咁有型，一早應該要係（喺）時裝界發展啦！」

最令網民念念不忘嘅莫過於睇得又打得嘅性感打女Maggie Q，佢因為出演美劇《Stalker》而同美國演員Dylan McDermott結緣，並拍拖3個月後訂婚，令唔少男粉大叫夢碎。自2008年後甚少喺香港現身嘅佢，現於美國拍戲拍劇發展，令唔少在港嘅死忠粉絲只可靠煲外國片一解相思之苦！

網民有話兒：

gXXXa：演又得，拍又得，好有才華！佢永遠都係我男神！

他XXX事：相信有唔少人都好掛住Maggie Q...

老XX：其實佢（李璨琛）咁有型，一早應該要係時裝界發展啦！

PXXXXy；但我又好鍾意睇佢（李璨琛）做古惑仔。

TXk：十年終於彈出頭來，支持蟻俠Paul Rudd！