Joe Junior自爆被逼同脱衣女郎跳舞

資深藝人薛家燕、Joe Junior、蘇珊、魯振順等出席晚會活動，今日生日的Joe Junior與現場記者一同唱生日歌，他透露在19號已與朋友及粉絲慶祝：「多謝歌迷對我不離不棄，嗰晚我唱歌，又有朋友贊助紅酒，玩得好開心。」他又謂今晚演出後便會到澳門與親戚及粉絲再慶祝。問到生日願望，今年踏入69歲的他表示希望身體健康。

提到節目《四個小生去旅行》，Joe Junior表示過有一樣東西不敢捉摸：「脱衣女郎畀我掂，但我唔敢，我驚，怕醜，未試過嘛！（四個入面邊個敢摸？）冇人敢，仲推咗我出去同啲脱衣女郎跳舞，佢哋真係冇着衫㗎，咁我隻眼唔知放邊，淨係望住個樣，好靚好甜嘅，立一眼就一直有個印象喺度！」

而今晚Joe Junior演唱《Pretty Woman》，他笑言會想着俄羅斯的美女去唱，問到是否指香港的女生不及俄羅斯？他即補鑊說：「都係一樣咁嬌小玲瓏！」他又提到這次旅程到過防空洞地下十八層，又在地鐵站獲靚女送花，不過最開心是能夠探訪當地民居的生活。