肌不可擋！周殷廷想靠身材冧粉絲？

新晉歌手周殷廷（Yan Ting）出席健身中心的代言人發布會，好友Super Girls的Yanny特意現身支持，又即場向Yan Ting取經學習泰拳動作，Yan Ting更脫掉外套，露出強壯臂彎 。

Yanny表示平日有向Yan Ting學習協調生活節奏，因為自己比較為食，而Yan Ting的自制能力高。本身新加坡人的Yan Ting笑言：「其實係紀律，以前喺新加坡當兵時，會學習點樣簡化自己生活，依家繼續保持住。（爆肌身型Keep得辛苦？）唔可以用辛苦形容，而係好難，但感覺做依件事值得。」

問到Yan Ting剛才為何不把背心都脫掉，大晒腹肌？他笑言要保持神秘感，是否要定位做爆肌型歌手引死女粉絲？他直言：「希望做到咁啦，都唔係話要吸引女仔嘅，係健康為主，唔係存心去練，我都比較想做創作型，係第一首歌咁啱又同打拳有關。」講到他的第一首派台歌《半祝福》的MV由Yanny做女主角，兩人表示故事將有續集《逃兵》。

Yanny又大爆Super Girls的成員都好欣賞Yan Ting：「好欣賞佢外在，內在同埋個精神，好多奇迹喺佢身上發生，由搵唱片公司，到操Body。」 YanTing就謙虛回應希望可以成為大家追夢的榜樣。