蕭正楠扮敗家仔入木三分 翠如媽媽都話似

20150724
東網電視
更多新聞短片
蕭正楠今次演敗家仔可謂入木三分,難怪翠如媽媽都話似。

藝人蕭正楠(Edwin)在劇集《風雲天地》中與性感女星孟瑤合演夫妻,面對性感尤物而且不乏Kiss戲,Edwin似向女友黃翠如備定案般,強調只是蜻蜓點水式Kiss戲,對於被翠如媽媽形容為「敗家仔」,他不但沒有不快,反而勁受落!

被讚有喜劇天分

Edwin坦言女友黃翠如亦有捧場睇《風》劇,他說:「佢阿媽仲話我扮敗家仔扮得好似,我聽到冇唔開心,反而覺得好高興,因為佢哋鍾意睇我嘅演出,我個角色就係一個敗家仔,好多女性觀眾會特別對呢類角色反感。(唔驚連累咗你形象?)佢壞唔晒,尾段會變番好。我同孟瑤今次有好令人笑到碌地嘅演出,聽講晶哥都有話我有喜劇天分,其實佢嘅笑片,我自細就睇,好多謝王晶畀呢個機會我搞吓笑。(同性感孟瑤合作唔尷尬?)唔尷尬,親熱戲都係蜻蜓點水之嘛!反而佢講廣東話對白,我哋就有NG!因為實在太好笑,Liza(汪明荃)如果在場,會執佢啲咬字同發音,都執得好嚴架!好彩我就不嬲冇乜懶音。(同Liza合作唔敢鬆懈?)Liza係我哋嘅好榜樣,佢對每場戲都有要求,亦都好着重同對手嘅溝通,今次我可以同Liza同埋其他好多位好好嘅演員合作,好開心又學到好多嘢!」

Edwin對於《風》劇收視暫時屈居於翠如有份演出的《愛.回家》之下,他說:「我都戥佢開心,聽講收視好好,打風嗰晚仲創咗紀錄添,我都有叫佢加油,要多多向張繼聰學習,嚟緊《風》劇都好緊湊,會講劉愷威知道係我害死佢心愛嘅女人,劇情一樣咁精彩!(翠如話你哋平日會研究劇本?)係架,我哋少出街,留喺屋企煮吓嘢食,之後就睇吓劇本,做吓筆記,有時睇到好嘅場口、對白會攞出嚟研究,呢輪我就鑽研緊《巨輪II》嘅劇本,我好鍾意我演嘅羅威信,佢性格同第一輯會好唔同,為咗守住家業佢會為自己做番啲嘢,唔再好似上輯咁逆來順受,我好期待正式開工!」