《賭城III》卡士費逾億　發哥被爆有分紅

鑑於《賭城風雲》兩集賀歲皆票房報捷，令導演兼監製王晶信心十足，《賭城III》宣布加碼投資高達2億5千萬人民幣（約3億1千2百萬港元），並找來周潤發、張學友、張家輝及劉嘉玲等一線紅星參演。

一向待演員不薄的王晶繼續實行「有錢齊齊搵」政策，據悉今集發哥片酬高達3,600萬人民幣（約4,500萬港元），家輝收2,000人民幣（約2,500萬港元），至於「友情演出」的嘉玲，片酬約500萬人民幣（約625萬港元），學友則收近800萬港元；連同其他重量級演員，單是演員酬金已高達逾億港元！不過王晶向來豪爽，不但不覺肉痛，反而認為物有所值，繼續「派錢」，讓好友們片酬齊齊「升呢」，認真皆大歡喜。

「高進」重出江湖

昨午一眾巨星雲集將軍澳無綫電視城「福地」進行開鏡拜神，吸引逾百中港傳媒到場採訪，場面墟冚。發哥在台上繼續發揮幽默本色，不時拿着手機與其他演員如王君馨、崔碧珈等靚女自拍留念。

強調自己抵用

事後他孖住嘉玲、家輝一起做訪問，再搞笑謂：「我今次負責情情塌塌部分，同學友撕殺爭嘉玲。嘉玲係我哋夢中女神，佢係『一舊雲』。」今次發哥一人分飾「賭神」高進及石一堅兩角，他說：「（電影《賭神》）相隔咗廿五年嘞，再廿五年嘅話我八張幾，點拍？」嘉玲在旁即答道：「唔好畀數字限制自己，有我陪你。聽講你片酬加咗，仲有分紅。」發哥即說：「我做兩個角色攞一部片酬喎。分紅？紅雞蛋呀？呢啲嘢今晚問問周太先。」

「瞓喺度」賺舒服錢

由於今次劇情延續上一集尾段，講述嘉玲墮機後昏迷，由於學友深愛這位女神，結果勾起憤恨之心要向周潤發報復。嘉玲全片臥床戲居多，僅得一、兩場出現在學友夢境的「動作戲」，難怪嘉玲笑說：「淨係瞓喺度，都攞到一部片酬呀！」

家輝拍到攰

發哥則說今次與嘉玲沒有咀戲，嘉玲聞言說：「哎呀，咁我申請嘞！」至於已經開了六、七組工的家輝則明顯攰爆，他淡然說：「要拍咗我、李宇春同機械人啲戲先，佢哋要送去做電腦特技，工序要多啲時間嘛。」