比堅尼照牽紅線!胡杏兒認對男友一見鍾情

20150804
東網電視
更多新聞短片
胡杏兒認對男友一見鍾情,Wow,好Sweet呀!

同夜場老闆男友Phil拍拖後,胡杏兒唔單止成個人開朗晒,仲變得更加暢所欲言。呢日,佢接受內地節目訪問時,大爆男友42歲之餘,仲自揭男友對佢一見鍾情嘅經過。

事緣,杏兒舊年喺微博大晒泳衣相,呢個行為,唔單止令一眾巴絲為止驚艷,連阿Phil亦因此被深深震撼。杏兒話阿Phil因為張相,覺得佢好hot,所以就托朋友介紹想話認識杏兒,不過杏兒當時請Phil食咗個大檸檬。不過緣份嘅嘢,要嚟就點都擋唔住,之後,隔咗兩、三個月之後,杏兒同好友食生日飯嗰陣,對方竟然偷偷咁叫咗阿Phil,就係咁,兩個有緣人終於見面,杏兒亦坦言對阿Phil係一見鍾情。

已經同男友拍咗九個月拖嘅杏兒,大讚阿Phil畀到好多安全感佢:「無論發生甚麼事,他都不會離開,他講過以我為驕傲。」佢又大讚男友好體貼,例如佢曾經試過要病住飛,佢男友就幫佢手執行李,仲試過幫杏兒吹乾個頭,等杏兒可以快啲有得瞓。