網民熱話:趙展彤強勢回歸冇人認得出?

20150805
東網電視
更多新聞短片
對比番趙展彤喺《超級巨聲》時期嘅細路女相,依家佢塊面真係尖咗好多喎!

內地人氣節目《中國好聲音》開到第四輯,成功吸引咗唔少「唱得之人」都上去一騷歌藝,令觀眾們刮目相看!而今次就有眼利嘅網友發現,曾經參與過無綫歌唱比賽《超級巨聲》嘅「暗黑小天使」趙展彤上咗《中國好聲音4》嘅大舞台,大晒rap功之餘,仲唱到反晒白眼!

人稱「白眼妹」嘅佢以一身個性look亮相,今次佢仲一反平時抒情嘅歌路,chok爆演繹由陳奕迅主唱嘅《謝謝儂》!期間,佢一度投入到反晒白眼,雖然畀導師哈林(庾澄慶)狂笑演繹方式奇特,但最後憑其獨特嘅rap功得到台灣天王周杰倫讚賞,可算為最大嘅安慰獎!而一班由細睇到佢大嘅網民就留言話戥佢唔抵:「佢細個個(嗰)時都有實力,但今次揀歌同演出都跌watt,唱得差過上TVB個(嗰)期!」更有人直斥佢嘅表情動作過火,令人反感。

由《超級巨聲》時期嘅細路女,突然搖身一變成為chok爆rapper,當然令大批網民都大叫驚訝,但講到令人最最最嘩然嘅莫過於趙展彤嘅「變臉術」!就連follow開佢instagram嘅網友都認佢唔出,仲即留言驚呼「點解嘅」:「我不嬲都有follow佢ig,點解都認佢唔到架?????」留言一出,隨即惹起網友們應聲附和。

網民有話兒:

膠x俠:佢明明hit唔到key,又扮有技巧咁做晒表情動作,真係好嘔心!

XX販理:哇!唱到反晒白眼咁,好似驅魔人~

MANxxxDY:點解著(着)到咁老?話佢26、7歲都有人信!

我個心離xx:睇下(吓)哈林個樣先啦。

Gianxxxcheung:我不嬲都有follow佢ig,點解都認佢唔到架?????

琴x超人:佢細個個(嗰)時都有實力,但今次揀歌同演出都跌watt,唱得差過上TVB個期!