林家聲骨灰將運返多倫多與妻子合龕

三度獲授勳的已故粵劇名伶林家聲於1993年告別舞台後，舉家移民加拿大多倫多，為承傳粵劇，近年林家聲留港居住，而長子林潤笙為了工作關係而留在多倫多，未能隨父返港。

林潤笙接受dbc電台徐蓉蓉訪問，表示當接到父親突然離世的消息後，捱通宵把手頭上的工作安排妥當，立即趕返港為父親辦理身後事。林潤笙偕妻子Grace於清晨五時抵港，談到父親離世，林潤笙難掩內心悲傷而流下男兒淚：「我都覺得好突然，嗰日我喺多倫多寫字樓接到周振基博士（林家聲徒弟）打嚟嘅電話，話爹哋唔得，應該冇希望，醫生作最後努力……我覺得好突然。」

當得悉父親離世消息時，林潤笙說：「好唔捨得……爹哋，始終呢兩年，佢嘅健康情況較為反覆，有時好正常、有時好唔妥。所以我都抽多啲時間返港陪佢。」 他非常感激一直照顧父親的親朋好友。「係佢哋細心照顧，爹哋嘅生命一直維持下去，令佢可以對社會作出貢獻。」

紅荳子為丈夫安排回港大計

2009年，林家聲在太太紅荳子（粵劇花旦）逝世後數月後，回港參加文藝滙演，之後留港居住，為粵劇承傳出力。林潤笙完全支持父親的決定： 「這個決定是完全正確，本來爹哋同媽安排咗退居幕後，將研究粵劇嘅心得出書，整理資料，保留粵劇藝術，喺呢方面，爹哋同媽咪想法都係一致。」

原來林家聲回港亦是太太逝世前為他安排的工作，林潤笙說：「所以爹哋一定返港表演，履行呢個工作，如果佢冇患上柏金遜症就好喇，可以更活躍幫助承傳粵劇，不過，佢坐輪椅都好、身體點樣都好，佢都會堅持指導後輩。」

父子分隔兩地，林潤笙坦言牽掛：「好在有周生（周振基博士），有一班支持爹哋嘅戲迷同好友照顧爹哋，佢哋好細心，有佢哋喺爹哋身邊，我好放心，不過，每年我一定返嚟幾次探佢，始終，就係想親眼睇到佢，親手摸到佢…好親切。」說到此時，他已經泣不成聲。

粵劇宗師同意過身後火葬

問留港多久？他說： 「今次會返嚟幾星期，一定要將爹哋後事辦妥，帶埋佢嘅骨灰返多倫多同媽咪合龕。」原來，早在紅荳子去世後，林家聲已同意自己過身後也會火葬，他要和太太生則同衾，死則同穴。「佢哋嘅骨灰位早已選妥，同弟弟潤添一齊放喺高山墓園，父母是合龕，弟弟都喺同一地點，只係位置唔同。」

感謝親友戲迷細心照顧

林家聲在粵劇藝術上成就非凡，問林潤笙可有想過如何安排他留下的大批資料？他說：「爹哋喺藝術上建立咗相當多嘅成績，我有意安排推廣，但仍未有確實計劃，依家先將爹哋後事辦妥。」林潤笙再三感謝幾年為他細心照顧父親的親友，更多謝一班戲迷對父親不離不棄，令他無憾離開人間。