低胸露線谷品牌　袁彌明想搵羅霖代言

藝人袁彌明（Erica）為自己的「袁彌明生活百貨」銅鑼灣分店開幕，穿上超低胸連身黑色裙的她大晒事業線，更在老公面前重現廣告親密甫士，又獲好友王宗堯從後攬頸兼抱抱，她笑言：「老公今日特別批准我咁着，平日出海唔畀着三點式架！」已開多間分店的Erica直言今次豪擲19萬開地舖，但相比開了六年的樓上舖多了不少walk-in客人，試業幾日生意額更比樓上好：「生意都食到，加上銅鑼灣係本店，所以儲咗好多熟客，而且附近都係好優質嘅客，我成日都喺度坐陣，親力親為。」她並謂正物色地點再開分店：「會再考慮尖沙咀開地舖，因為依家尖沙咀要行兩層樓梯，送貨都好麻煩，一係睇商場一係睇地舖，但嗰邊啲租仲未跌，因為之前自由行太勁。」

提到以友情價邀得「新一代男神」王宗堯拍廣告，令面膜銷售量瞬間多一倍，她指年頭推出至今賣了七千多瓶，更相信日後可賣出五萬瓶。Erica說：「希望宗堯愈紅，咁我哋銷量愈高，我對佢好有信心，覺得佢好有才華，相信演戲、做電視、電影發展都會好好，反而同高鈞賢入行十年，我覺得佢都好有潛質，但我諗佢要到30幾歲，男人味開始散發多啲就會好啲。（搵佢代言？）都可以，但咁多男代言人，我想搵個四、五十歲女星，因為我哋好多產品係抗衰老。（羅霖？）可以呀，佢keep得好好，但我驚佢好貴。」