網民熱話：激似！藝人卡通撞樣逐個捉

唔少睇完卡通電影《玩轉腦朋友》嘅網民，都驚訝片中角色「阿愁」同藝人林盛斌（Bob）撞樣，除咗一樣咁肥嘟嘟，同有副招牌粗框眼鏡外，「阿愁」仲有一對超人性化嘅憂鬱粗眉及無辜大眼睛，神髓上極為相似。網民仲叫「阿愁」做「愁版阿Bob」、「膽小版阿Bob」，又猜疑作者係照住阿Bob嚟畫！雖然阿Bob同「阿愁」呢對跨越二次元空間嘅「失散兄妹」未相認，但一班網民就好心急希望佢哋早日「團圓」，仲順帶搵埋一堆藝人同卡通人物嘅「失散」例子，促請佢哋早日相認！

黃伊汶、李家鼎、Troll Doll

歐洲玩具公仔Troll Doll擁一對超級大眼睛，及一隻有肉地嘅扁鼻。網民直指佢五官似歌手黃伊汶及藝人李家鼎，仲話佢哋係「三兄妹」。基於Troll Doll喺香港唔太流行，所以好多人都講唔出佢個名，每次提起時都會問：「好似黃伊汶隻公仔叫咩？」證明佢哋關係幾咁密切！

元華、結他他老伯

藝人元華同卡通《咕嚕咕嚕魔法陣》中嘅結他他老伯一樣有條「二撇雞」，兩者又眼細細，相似度爆燈！有網民仲代入結他他老伯咁話：「我細細個就睇元華做戲，我所跳嘅結他他舞，靈感都係取自佢功夫片中嘅演譯！」

鄧梓峰、巴斯光年

眾所周知藝人鄧梓峰同動畫《反斗奇兵》嘅巴斯光年撞樣，就連鄧梓峰每次見到「失散兄弟」巴斯光年時，都會不忘同佢影張靚相！久而久之，網民都大呼「好混亂」，仲問：「到底係鄧光年定係巴斯梓峰？」、「鄧梓峰衝出荷里活飾演巴斯光年！」

高海寧、SAW

藝人高海寧（高Ling）初入行時已被網民稱為「女神」，成唔少宅男嘅理想對象！但當時突然有網民指高Ling似電影《恐懼鬥室》中嘅角色「SAW」，唔少網民大呼有同感。但因為「SAW」形象太恐怖，網民都話高Ling堂堂一個女神就被沾污喇！

網民有話兒：

人xxx似到一個地步係我懷疑啲人照住佢地（哋）個樣畫！

サxxン：黃伊文同Troll doll好似倒模一樣樣

Moxxxa Monica Chan：仲有高Ling，唔知似邊隻恐怖公仔XD

Frxxxrich Apxxxon Lau：鄧光年，巴斯梓峰

十xxx：唔好再講高Ling似SAW喇！