宣傳定動真火？謝賢摑完曾江再下戰書

被傳有積怨數十年的資深影星謝賢及曾江，昨日宣傳無綫旅遊節目時，謝賢多次爆粗狂轟曾江詐病及呼喝工作人員，錄音時又被對方頂撞，謝賢忍不住嬲爆出手摑中曾江，意圖勸交的胡楓亦被撞甩眼鏡！事後曾江笑笑口表示沒有嬲，謝賢卻明言不想再見面，對於曾江表示等他道歉，謝賢說：「叫佢等我入棺材嗰日啦！本身都唔係真正朋友！」

83歲胡楓、80歲曾江、79歲謝賢及68歲Joe Junior昨日在酒店宣傳旅遊節目《4個小生去旅行》，與司儀陳庭欣分享到俄羅斯的遊歷，四位加埋超過三百歲的小生在台上與俄羅斯舞蹈員共舞，但跳到一半謝賢臉露不悅落台坐，之後大會推出蛋糕為他補祝生日，三位小生更為他唱生日歌，當時表面氣氛依然愉快。

等高層離場後「發難」

其後四人受訪時大談遊歷，輪到謝賢發言時，他說：「唔好畀我講，我會講唔好嘅嘢，係有唔開心，但都捱過咗。」現場氣氛頓時勁尷尬兼Dead Air，胡楓等三人即鬥講難忘事圖打圓場。記者為緩和氣氛，跟謝賢談起前日謝霆鋒及兩位孫仔為他慶生的開心事，當再問到在節目過程中有何不滿？他說要待無綫高層及贊助商離開後再講，期間三位小生接受無綫及內地傳媒訪問，謝賢一直黑面坐着，但仍有應陳庭欣及梁麗翹要求笑住合照。

待有關人士離去後，四位小生再度坐埋受訪，蓄勢待發的謝賢正式「嚟料」狂鬧曾江，夾在中間的胡楓試圖勸止，負責幫記者拎咪的Joe則呆在當場，表現無奈，「揮掌怒打曾江」事件亦告發生！

事後謝賢及曾江分別接受電話訪問，謝賢起初笑住表示心情已好轉：「我梗係要打佢啦！你哋見過我咁嬲未呀？我做咗幾廿年都未試過咁嬲呀。」至於曾江則表示冇不快亦冇嬲：「可能我過份咗，佢又過份咗，冇事嘅。（佢真係打到你！）係咩？當時場面咁衝動都冇咩感覺。（報警？）癡線！點解要咁做。（再合作？）梗係會啦！（下次握手言和？）唔會公開做啦。（佢有冇打畀你道歉？）冇喎。（等佢打嚟？）係呀，哈哈！」

寸曾江扮嘢：我知佢啲衰格嘢

而謝賢得知曾江會等他道歉電話時，即再扯火說：「叫佢等我入棺材嗰日啦。（仲好勞氣？）梗係！要懲戒佢，以為自己不可一世！拍嗰陣已經諗住忍，但尋日佢唔畀面我，話我拖累佢，喺導演監製面前咁講，我仲使撈嘅？」謝賢再轟曾江呼喝工作人員，又不時搶鏡擋鏡頭：「有次我哋煮嘢食，企咗兩個鐘佢都唔痛，擺明係扮嘢啦！識佢好多年，喺台灣已經識，一直冇來往，因為我知佢啲衰格嘢，今次辣到我，我唔使畀面佢。（再合作？）見都唔想見呀！（之後仲要宣傳喎？）係呀！我17日（下周一）會請食飯。」之後謝賢更謂：「佢敢就嚟啦！（高層余詠珊話擺和頭酒！）冇得和頭，當識少個人，本身都唔係真正朋友！」頗有下戰書的味道。

而在謝賢發火爆粗期間無辜中招、以致眼鏡都歪埋嘅胡楓，被問到知否謝賢曾江是否真的有不和時？他說：「現場睇一啲都冇嬲。（係咪不滿曾江詐病？）講笑咁講啫，佢哋不知幾好傾，最多嘢傾係佢哋，不時飲住酒傾。（係咪有心結？）唔知，但搵着我嚟搞，打我唔緊要，唔好打我副眼鏡嘛。」問到會否致電謝賢？胡楓說：「叫佢賠（眼鏡）？等佢下咗啖火先啦！」《東網》記者會後再致電修哥，笑言老婆知道事件後感到肉赤，並再強調謝曾好好傾：「可能就係傾出火花嚟！呢啲係宣傳嚟！（咁你啲戲幾渣喎！）我啲戲渣？我做咗戲幾十年，之後仲有宣傳，下次等我郁手打阿Joe（Joe Junior）。」

《4個小生》監製蘇敏儀昨日透過電話回應，對於曾江被指呼喝推輪椅的工作人員，她說：「冇聽過，佢有時大聲，係因為佢耳聾，大家有時大聲、好強咁，但其實都冇嘢。（幕後向你呻？）冇，我哋拍攝過程同前一輯一樣開心、愉快。」並謂整個行程也未覺不妥，故也被昨日的「數臭郁手」事件嚇窒，並謂稍後會致電謝賢了解。

「點請到四位大帝做大戲」

提到謝賢揚言不再跟曾江合作，問下輯可會飛起謝賢？她說：「咁快諗下一輯？其實佢哋年紀都大啦，好辛苦。」蘇監製又力撐四位為人很好、很可愛，大家都玩得好開心。問事件是否宣傳伎倆？她說：「係就多得佢哋唔少，有佢哋四位坐鎮，我哋都毋須要咁宣傳，何況我哋點請到四位大帝做咁大台戲呀！」

無綫企業傳訊部副總監曾醒明，亦鄭重澄清事件並非宣傳手法：「謝賢同曾江都咁有地位，又唔係無綫合約演員，就算有咁嘅諗法，佢哋都唔會做。」無綫非戲劇製作總監余詠珊則表示經了解後，知道曾江、胡楓都沒有嬲謝賢：「佢哋都係一班快活老人家，加埋都三百歲，變埋細路哥咁，睇吓遲啲使唔使同佢哋搞番和頭酒啦！」

而有份出席記招的藝人梁麗翹及陳庭欣，則對事件反應各異。梁麗翹指目擊事件時十分愕然，但不清楚來龍去脈；而擔任司儀的庭欣則指自己事發時在台下吃小食，只知道謝賢很勞氣及拂袖而去，並謂事前覺得眾人並無異樣。

另謝賢兒子謝霆鋒則透露經理人霍汶希回應表示：「霆鋒知道（件事），佢唔回應啦。」