食住張智霖　袁詠儀唔驚有個童顏老公

藝人袁詠儀（靚靚）出席健康食品品牌活動，身為品牌的首位代言人，與五歳童星Marcus一同拍攝最新電視廣告。靚靚表示兒子張慕童（魔童）快將開學，早前就趁暑假假期一家三口到美國度假：「佢好早就放暑假，六月中就放，一路陪住佢開學，佢返學我就有番好多私人時間，我哋去咗美國兩個星期，我就做咗工人兩個星期！曬完返嚟，好多人話我黑咗同精神咗！」靚靚又指希望透過今趟旅行，可以訓練魔童更獨立：「我覺得好成功，至少會摺番自己啲衫落喼，好企理，自己執喼同推喼！但都係家長問題，但又唔怪得佢哋嘅，因為公公婆婆湊，孫係要嚟縱！」

靚靚其後自爆雖然外界不時大讚老公張智霖（Chilam）愈來愈後生，但自己並未感到壓力：「我都有我嘅市場，佢成日都問我去邊，緊張過我！我成日同朋友講笑，畀人問點解成日一齊，我話因為一個怕黑一個怕鬼，要互相保護！大家同一個圈，好了解大家作息時間，好珍惜去旅行時間，工作時就好努力工作，再計劃去旅行！」

而談到9月4號，正值其正日生日，靚靚則笑言：「愈嚟愈唔使慶祝，踏入四十歳之後，最緊要健康，最緊要係同最好朋友食餐飯，有小朋友陪住！」