網民熱話：民選港姐林潔瑜VS大美人李嘉欣

距離《2015香港小姐競選》唔夠兩個星期，踏入白熱化階段。呢個時候，有網民就翻Loop曾紅極一時嘅2009年落選港姐林潔瑜（Esther），仲喺網上開Post大呼：「原來又夠鐘選港姐，好掛住林潔瑜BB」選美向來以「美貌與智慧並重。」作為最大原則，但當年林潔瑜竟然因為激似許愿而受到海量網民力捧，而且仲令巴絲們對佢念念不忘！至於，另一邊廂，亦有網民重溫「大美人」李嘉欣（Michele）喺1988年選港姐嘅片段，當時佢憑出眾外表驚艷全場，至今亦為人津津樂道。唔少網民仲話，佢哋兩個都係港姐界奇迹！

「女版許愿」林潔瑜

依家30歲，眼細口大嘅林潔瑜，有「女版許愿」之稱，雖然五官有別於傳統美女，但就勝在口才夠好，而且EQ高。每次喺現場活動亮相時，佢都以轉數快同大方嘅表現引人注目，就連藝人陳百祥（阿叻）都曾公開大讚林潔瑜係可造之材！對於智慧出眾嘅林潔瑜，當時有網民積極喺各大討論區洗版及拉票，令佢大比數抛離對手，成為民間冠軍！坊間指事件為「林潔瑜現象」、「林潔瑜之亂」，雖然最後佢落選咗，但都輸人唔輸陣，認真夠威！距離林潔瑜選港姐不知不覺已經有6年，網民就話好掛住佢，仲將佢起底，話佢近年已經結婚生仔，過緊少奶奶生活喇！

「大美人」李嘉欣

相反現年45歲嘅李嘉欣，就以驚為天人嘅出眾外表成為港姐界奇迹。身為1988年港姐冠軍嘅佢，多年來均被譽為「最美港姐」，亦係歷年「美女嘉欣」之首。網民翻Loop網上名為「88年港姐比賽現場版 驚豔 李嘉欣」嘅短片，當時參賽號碼為4號嘅李嘉欣，甫出場就引起全場驚呼！標緻嘅五官及高佻嘅身材，登時秒殺其他佳麗！而佢一舉手一投足亦儀態萬千，由內而外散發出氣質，難怪順利摘得后冠。至今已息影嘅李嘉欣，同才俊老公許晉亨結婚後，仲一索得男誕下囝囝許建彤，成為眾人羡慕嘅幸福少奶奶！

網民有話兒：

塵x：原來又夠鐘選港姐 好掛住林潔瑜

小x：過左咁多年 我都忘記唔到純真既（嘅）瑜瑜

九龍xxx：事實證明瑜瑜都仲係咁受歡迎

沒有xxx：今年喺（係）第七年？

就算xxx深：瑜瑜之前（喺）我間學校講talk

Hiu Ching K：以前的人比較漂亮，氣質也比較端莊大方。