【日日都係七夕】盧冠廷靠唱歌娶得美人歸

唱作歌手盧冠廷（LoLo）於柴灣錄影nowTv節目，而其老婆唐書琛亦化身「跟得夫人」陪同左右。

問到表現恩愛的二人如何慶祝七夕情人節？LoLo搞笑表示連結婚周年都忘記：「我唔知（七夕），幾時結婚周年都唔記得。不過老婆都係，我哋鬥唔知！（唔駛慶祝？）日日都咁好咪日日都過節！」他又笑言當年靠唱情歌輕鬆娶得美人歸：「我哋剛認識時佢成日捧我場，有意無意唱畀佢聽。（咁就娶到老婆？）好易o架咋！」

談到日前LoLo推出的Hifi碟銷量達到金唱片，他竟直言未感滿意：「人哋後生嘅攞會開心到飛起，但我就有唔同感覺，因為以前試過唱片淨係賣得一萬五千張。（滿意新碟成績？）再好啲就滿意，我係個要求高嘅人。」問到LoLo會否打算再推出新碟超越前作？他笑說：「每次都想（創作）比以前更好，唔理賣唔賣得，係品質（好）令我夜晚瞓得着。（試過好大壓力？）係，但依家身體冇問題。（再出碟或舉行音樂會？）稍後大家就知！」