儲夠8個契仔女　佘詩曼考慮學葉璇凍卵？

藝人佘詩曼出席酒店開幕活動，對於日前被《東網》獨家拍到，出席蘭桂坊新夜場開幕時，不勝酒力的她，除與友人擁抱時整個人挨落他人身上，更要兩名「大隻男」幾乎抬出場外。對此，阿佘則表示：「不勝酒力！（當日好開心？）Work hard play hard！（真係醉咗？）自己酒量不嬲麻麻！（咁謙虛？）係真嘅！（飲咗好多場？）正係嗰個開幕，因為朋友開，支持吓！（有冇覺得好失威？）冇暈到，自己走到！（要大隻男扶住？）佢哋好有風度！（第二日就寫感性求愛論？）冇！我諗唔係我嚟！我冇寫過！」

朋友掛住湊仔　冇做媒人

對於身邊不少好友也相繼結婚生子，阿佘表示為好友們感到高興：「自己就隨緣！生活最緊要開心滿足，我依家好開心。（之前有傳搵師父求姻緣？）基本上係舊聞，所有相都係舊相，只可以講拜佛係一個信仰，求真理同道理！唔係渴求個人欲望！（咁有冇順便去求咩？）都係聽師父講做人道理，所有嘢都係操控自己手上，唔係渴求就OK！（好多姻緣喺身邊？）隨緣！（朋友有冇介紹？）全部掛住湊仔！（依家有幾多契仔契女？）好多！有八個！好意頭！（想結婚生B？）一步一步嚟！一切順其自然！（學葉璇凍卵？）哦！順其自然！」

阿佘又指與無綫合作最快要到下年，又指不會要求公司為其度身角色才會點頭演出，因演員就是要演繹出不同角色。