韓君婷否認攣情：為工作患抑鬱

藝人韓君婷（Belinda）接受有線娛樂新聞台訪問，闊別娛樂圈五年，最近回港發展，談及被外界盛傳她整容失敗，Belinda否認：「我冇整容，只係之前發生咗意外，我喺浴缸跣腳仆親，迎面撞傷咗鼻骨，當時啲血流唔停，好似水喉咁湧出嚟，我真係驚自己會死。」

始終都係選美冠軍

問會否考慮做矯形手術？Belinda說：「當然會考慮，醫生建議我兩年後先可做矯形手術，修復鼻骨。但我依然覺得自己係靚女，話晒我都係選美冠軍！」

早年有傳Belinda因與同性密友陳早茵分手而患上抑鬱症，她澄清：「我同陳早茵只係好朋友，大家誤會咗我哋嘅友情，由始至終我都好清楚自己嘅取向，一定唔會對女仔有感情，更唔會同女仔一齊。（因分手而患上情緒病？）冇咁嘅事，咁重要嘅事我唔想同啲唔重要嘅人扯上關係。我係因為工作上諗唔通而有少少抑鬱。我又想證明畀人睇我係瘦到，所以一直減肥，結果過咗火。」