散Band重敍舊講舊史　陳潔靈葉振棠邊唱邊學

資深歌手葉振棠、陳潔靈（Elisa）接受區瑞強主持的電台節目訪問，三人暢談當年情，葉振棠透露在澳門畢業後來港找工作，被朋友邀請加入樂隊當補替，之後成為The New Topnotes的低音結他手，一切純屬偶然。

The New Topnotes主音Elisa回想昔日的威水史：「樂隊解散前，我哋曾經去意大利巡迴演出，製作咗一張EP，登上咗歐洲流行榜，我哋仲上過意大利電視節目，大家着上功夫衫，配合當時嘅中國熱。」

樂隊於巡迴演出中途解散，二人亦各自發展，當時本地歌手由以唱英文歌為主改為唱廣東歌，葉振棠亦順勢加入名為「馬正棠」的組合，推出廣東歌大碟。及後，他為麗的電視主唱了《浮生六劫》、《大內群英》和《太極張三豐》等電視劇主題曲，劇集揉合西曲中詞，每首歌都深入民心。

英文歌假音唱好廣東歌

而他要用假音演繹的電視劇插曲《戲劇人生》，則另藏一段故事，他說：「呢首係《浮生六劫》嘅插曲，本來由馬敏兒主唱，佢演繹起嚟有啲難度，黎小田對效果唔太滿意，就話：『不如搵Johnny（葉振棠）唱啦！』馬敏兒個Key較低沉，我試唱覺得可以，但當錄到結尾，原來好高音，我話用真聲唱唔到，建議用英文歌嘅假音唱法，結果就錄好咗。」

不停自我增值提升歌藝

Elisa單飛後亦以唱廣東歌為主，與張國榮合唱的《只怕不再遇上》、《誰令你痴心》成為了情歌經典。雖然一直被讚歌藝高超，但她仍然不斷進修和自我增值，終令歌藝不斷提升，演繹出來的歌曲更豐富，她說：「音樂需要啟發性，你可以喺音樂領域上啟發，好似進修樂理咁，但更重要係你嘅人生同眼光，任何同人生有關嘅嘢，都有助豐富你嘅音樂。」

Elisa談起十多年前開始與舞台劇《麗花皇宮》結緣，飾演「蓮茜」一角，既懷念又興奮；對於當年曾與黃霑、葉振棠和葉麗儀等合作，實在回味不已。

她近年在電視節目《超級巨聲》中擔任評判，過程中一方面可與參賽者分享意見，同時亦令她受到不少「刺激」。「佢哋提出我嘅錯誤，但我話畀佢哋知，唔等如我做得到。所以事後我對自己要求更高，無論係對歌唱或聲線轉換嘅方式，我都比從前更勤力千倍。同佢哋分享，其實係刺激同幫助咗我。」