未拍拖諗生B　糖妹想36歲前生兩個

糖妹（黃山怡）到觀塘拍攝無綫節目《精伶童學會》，她說：「今日係最後一集，請薛家燕做嘉賓係好啱，因為之前啲嘉賓都係新手父母，好似陸永、呂慧儀等，但啲橋太新，都冇法對應新一代小朋友，你知唔知我點解把聲有啲沙？因為小朋友雖然乖，但我拍攝時都要間中扳起面孔，先至控制到場面。」

糖妹又指獲小朋友送上新封號，她說：「佢哋叫我做『糖妹姐姐』，又妹又姐姐咁，我覺得幾特別，我諗我可能就快出兒歌。（薛家燕被小朋友封「家燕BB」？）啲小朋友都有喺社交網站留言畀我，話好掛住我。（想自己生番個？）生兩個，仲要唔好隔太遠，等佢兩個可以自己玩嘛，暫定35或36歲前，仲有好幾年時間，慢慢搵另一半，同埋等自己事業穩定先。」

糖妹又指錄影工作完畢，即要出埠，她說：「會同班低收入家庭去台中玩，因為台灣我熟，我都知台灣出現登革熱，本來我預備咗蚊怕水，但唔記得放入喼，陣間去買番先。」