投資新片遭盗錄　林文龍嬲爆搵證據

藝人林文龍、林熹瞳（Rachel）及艾威等於尖沙咀出席活動。期間文龍大爆獲友人告知，日前其有份投資的電影《我們停戰吧！》首映期間遭人進行場內盗錄，他說：「以前我唔係投資人，今次真係針唔拮到肉唔知痛！有兩個人入戲院偷拍，影響都大。不過我冇親眼見到，係聽朋友講番我知。我問佢做咩唔（即時）打畀我，佢話見人哋咁明目張膽用手機影，以為係我同事拍reference，（如果）我要拍都擺部靚機啦！本身戲院應該有職員駐場，唔知點解嗰時冇。」

林文龍直言正追查事件，又稱今次涉及公義問題。問到他會否訴諸法律追究？林文龍卻表示先搜集證據，但強調不想搞大事情：「首映請嘅係朋友嘅朋友或行內人，當時佢哋（盗錄者）附近有行內人都冇阻止，我會睇睇件事可信度有幾高。（法律追究？）搵咗（證據）先，（到時）同律師傾。可能對方淨係影幾個鏡頭，唔好將件事搞咁大。」自編自導自演該片的Rachel，亦表示為此感到氣結：「好嬲，我哋會發聲明，好離譜，可能會影響到大陸發行問題。」

此外，林文龍又透露與拍檔林熹瞳合作愉快，正忙於為另一部新片覓得內地有份量的女星出演：「下一套係驚慄片，劇本都寫好，想搵內地女演員。（心水？）有一堆名單。（驚慄題材驚過唔到內地審批？）同有關部門傾過，應該接受。」