阮兆祥一生「演繹」滿分兒子

最叻扮嘢、搞笑的阮兆祥（祥仔）在觀眾印象中是一個扮嘢能手，扮過無數人物的他，直言自己不是個回頭望的人，他說：「冇最拿手嘅角色，我永遠想下一個做嘅係最好！超越自己先畀到我滿足感，好多喺大家心目中好有個人特色嘅人其實都扮晒，我哋一輯入面扮七十幾個Artist，有共鳴嘅實有機會重複去扮，但一定要超越上一次嘅相似度同深度，令大家覺得你有進步！」

祥仔亦承認《福祿壽》對他的重要，是演藝生涯中重要的里程碑：「喺我演藝歷程入面一份上天送畀我嘅大禮物，又識到兩個好兄弟，做出嚟嘅嘢同我哋最初理念一樣，分開之後又有自己獨立發展空間，但過咗一段時間再聚埋一齊，又再帶正能量畀大家！能夠喺一個大家唔睇好嘅情況之下，大家會覺得呢啲組合好快會散、唔會長久，但由開始到依家，我哋3兄弟都仍然一條心，我好高興同感恩！」

出現多套戲劇的祥仔，認為要扮演得最好的角色只有一個說：「係做一個『兒子』！一生入面做好多角色，但如果本身喺現實生活做人哋個仔都做唔好嘅話真係冇用，我當然唔敢講我係個滿分嘅兒子，但我希望用有限嘅時間多多關心媽咪，好想突破自己喺佢心入面嘅分數！（最想多謝都係媽咪？）多謝嘅人好多，真係要數一直以嚟畀好多機會我嘅觀眾，冇佢哋Support基本上做嘅一切都枉然！」

本身以歌手出道的祥仔，提醒大家他一直都有新作品，坦言自己對音樂的熱情從未減退說：「我仍然Consider自己係歌手，仍然好鍾意音樂。依家想同人分享音樂有好多唔同媒介，唔一定要出實體嘅碟，我可能會喺每次嘅表演，趁住唔同嘅主題去啲新嘅音樂作品。」