黃宗澤想搵爽朗型女友：唔好成日要我照顧

藝人黃宗澤（Bosco）出席Valentino男裝店開幕活動，他受訪時即向記者朋友預祝中秋節快樂，問到他中秋節如何度過？他說：「我約咗屋企人做節，尋晚就同三哥（苗僑偉）、三嫂（戚美珍）同我媽咪一齊食飯，後嚟樂小姐都有嚟，跟住我仲同佢哋嘅話題脫節，因為佢哋講生仔，我唔啱channel，自己低頭食飯。（媽咪有冇借機催你？）我媽咪又冇催我，冇要我幾時去識女朋友同生仔。（咁你自己有冇計劃？）暫時未有，但三嫂同我講叫我試吓，生咗就唔同感覺，我話依家女朋友都冇，會唔會太快。」

無聽聞TVB封殺杏兒

他續表示忙完劇集宣傳後，將需到杭州進行拍攝工作，問到會否在內地搵另一半？他說：「隨緣啦，睇上天安排，依家冇乜緋聞，畀我可以識吓女仔，有緋聞就會話我有女朋友，唔使介紹我識嗰啲架啦，所以依家幾好。（想搵咩類型？）爽朗啲，唔好成日要我照顧，因為我冇乜時間。（要照顧番你？）咁又唔使照顧我。（咁你前女友胡杏兒咪有機會早過你結婚？）如果係要恭喜佢。（聽聞無綫話封殺佢？）係咩，唔知喎。（會唔會覺得公司小器？）咁又唔會，我聽聞佢有機會返嚟拍戲喎，我唔清楚呀，其實香港娛樂圈咁細，簽邊間有咩所謂，重要係有好嘅合作關係。（你傾續約未？）我仲有約，仲有一段時間。」