方文歡迎競爭:有實力先做到發燒歌手

20150926
東網電視
更多新聞短片
方文同意雖然競爭大咗,但係覺得有實力先會做到發燒歌手!

「發燒女聲王」方文出席新碟分享會,獲專輯監製向雪懷和音樂總監Richard Yuen到場支持,她亦即場唱歌。受訪時她透露此張專輯是在八月音響展期間推出:「因為隻碟喺奧地利錄製,音響展第一日先啱啱趕得切售賣,然後隔兩日就簽名會,上次好趕,好多人趕唔切去,所以就今日舉行番呢個分享會。」她亦講到此是第六張專輯,主要都是翻唱此張專輯監製向雪懷的作品,然後舊曲翻唱,她亦表示因為做發燒碟成本高,故宣傳費就變相不太多,所以感激發燒友和行內人支持。

講到近年愈來愈多新一輩歌手翻唱歌加入發燒碟市場,問到可會覺得拖垮質素?她就覺得不會拖垮,因為做得發燒碟音樂水準都很高,而且很多歌手翻唱都是以好歌為主:「同埋好多歌手都有翻唱人地啲歌,外國都有Celine Dion、Mariah Carey,編曲都好出色,同埋可能依家多咗唱片公司爭相投資出發燒碟,變咗大家覺得咁多發燒歌手翻唱歌,而且我發覺依家趨勢係將發燒音樂同流行歌融合出嚟。(覺得競爭大咗?)會架,不過都係好事,好先會一齊競爭,不過都唔會覺得大壓力,因為我都會做好自己,每個歌手都有自己特色,大家都會認同有實力先會做到發燒歌手,其實我早幾年都係流行歌手出身,所以係唔係發燒歌手都只係一個名銜,最緊要音效好,因為依家都好多人啱啱做發燒碟,可能未夠經驗,所以質素都會參差咗。」

她亦透露有意舉行音樂會:「2013年就做咗個向Carpenters致敬嘅演唱會,上年就喺馬來西亞同其他發燒歌手一齊做音樂會,嚟緊都想喺香港搞呢啲騷,可能出年啦,都想籌備個高質素嘅音樂會。」