東方日報C1：朱慧敏單身過中秋飛Eddie

昨日是人月兩團圓的中秋佳節，可是無綫藝員朱慧敏卻揀這天正式宣布與拖拉多月的「前未婚夫」彭懷安（Eddie）分手，將他降呢為「生意夥伴」，之前預訂好的酒席不惜撻訂，她更斬釘截鐵說：「希望佢快啲搵個新女朋友！」不過她未有受感情事影響心情，在台上笑得非常燦爛。

34歲前港姐亞軍朱慧敏（Queenie）年初決定與拍拖三年多的前EO2成員彭懷安（Eddie）明年結婚，惟5月中Eddie被《好報》拍得夜會索女，至情海翻波，Eddie大力箍煲，兩人感情一直拖拖拉拉。日前Eddie透露華星冰室股東舉行派對，放風希望「人月兩團圓」，未料Queenie昨日在中秋節決絕地與Eddie斬纜，令人唏噓！

「講太白傷到佢」

昨日Queenie出席中秋節活動，提到「股東派對」時表示當天身在內地未有參加，那麼Eddie豈不是很可憐？Queenie說：「唔慘！好多人陪佢過，總有機會同佢見面，睇緣分啦！祝佢中秋節人月兩團圓，快啲搵個新女朋友。（正式斬纜？）都持續咗一段日子，我哋關係係好朋友同生意夥伴，依家主要傾工作上嘅嘢。（之前畀人影到一齊返華星睇舖？）嗰幾日有啲圈中朋友嚟食飯，所以一齊落去招呼，我哋分得好清楚，工作就係工作，生意就係生意。（感情都分得開？）係，依家唔講感情，完全只限工作。（佢冇落力挽回？）天時地利人和，好多嘢睇緣分，將來嘅嘢唔知。（畫上句號？）我哋始終有感情、有情義，唔想講得太白傷害到對方，我哋一路關係良好、有溝通。」

各自尋找另一半

兩人已達談婚論嫁階段，更着手籌備婚禮事宜，Queenie說：「冇搞好耐，係有訂酒席。（全部撻訂？）係呀！（如果Eddie有另一半你唔介意？）我會好開心，衷心祝福佢，希望佢快啲搵到第二個，佢都係個好好嘅人。（分咗手？）有啲嘢唔想講到好白，我哋依家都係單身。（可以各自搵另一半？）係。」揚言目前未有追求者的Queenie，說想專心工作，一切順其自然：「唔做嘢好悶，家人喺外地，做嘢先有收入，可以儲多桶金置業。（下次會否搵個專一男？）我好信Eddie，佢唔花心。」

佳節安排節目多

回復單身後過中秋，Queenie並不寂寞，晚上約了朋友食飯，想到大坑欣賞舞火龍，前晚她跟另一班朋友首次打台灣牌打通宵：「我唔係好識打，冇斬獲，輸咗133蚊，但Auntie親自下廚有東星斑，好抵，租場都唔止！」活動中，Queenie在台上與市民玩遊戲時，心情大靚笑得非常燦爛。對於Queenie的「祝福」，Eddie昨日僅透過短訊回覆：「祝大家中秋節快樂。」並配以笑臉圖案，看似心情輕鬆。

更多新聞，請瀏覽東方日報網頁：

http://orientaldaily.on.cc/