J.Arie儲定歌等開騷

歌手J.Arie到商場出席live show，又即席自彈自唱，受訪時她透露香港很少這種live show，所以今次很開心能夠參與，亦會使盡渾身解數表演，問到可想舉行個人音樂會？她表示：「好想，依家都籌劃緊，同埋都儲緊歌，覺得音樂會好多歌都係唱人哋cover好似有少少對唔住觀眾，不過依家都有廿首以上嘅歌。（都差唔多夠歌？）係呀，所以都希望可以開騷。（最快都要出年？）係呀，呢個係下年目標。」

她亦透露自己首次拍戲並擔正的電影《死開啲啦》將於下周首映，坦言心情緊張：「到時就可以同導演、監製同演員第一次睇呢套戲，不過之前優先場都見啲觀眾睇得好開心，笑得咁大聲，我都好欣慰。（咁觀眾反應好仲緊張？）唔知呀，尤其是票房，畢竟我哋個組合都好新，自己都係第一次拍戲。」

問到可想在電影方面更多嘗試？她表示一開始入行是想做歌手，但亦不抗拒拍戲：「可以畀人知原來我有咁癲嘅一面。（想挑戰咩角色？）想試下一啲感性嘅角色，因為好難。（喊戲個啲？）係呀，因為自己天蠍座，比較收埋自己，同埋都想試吓做一啲有精神問題嘅人，自己都比較瘋癲，同埋社會有呢啲人，可以為佢哋發聲。」