【突破自己】若琪初試性感

一向走「型女」路線的歌手若琪（Takki），不知不覺入行達7年。達「7年之癢」的她心癢想轉型，即將在下月推出新創作歌，還會突破自己，以性感示人，她謂：「以前我畀人感覺會中性啲，今次對我嚟講今次都幾大尺度，會多啲女人味，唔想畀人感覺太難接觸，希望型得嚟又會性感，我唔希望件事變到好俗。」而在今次專輯，她會與今屆電影金像獎的「最佳原創音樂」得主李端嫻（Vee）合作，組成全新樂隊「日月系」。很多人可能對「日月系」這名字摸不着頭腦，她解釋原來這名字大有意思：「今次創作會有好多關於時間嘅題材，日同月係時間上嘅一大對比。我同Vee嘅背景好唔同，但我哋兩個同道中人喺有緣下相會，呢次Project就係講緊呢樣嘢。『日』係代表Vee，因為佢比較開朗；『月』係代表我，因為我係多愁善感，哈哈！」

提起創作，她頭頭是道，由骨子裏散發出才女氣質。但原來她的靈感，有不少歸咎於她以往的愛情經歷，她謂：「我呢世人有兩個人係最Hurt我，我明有時兩個人會冇feel，但我最憎人冇Feel但仲要拖住我。」受到傷後，她會透過音樂來發洩感受：「拍拖會帶到畀我好多感受，失戀會寫到一啲好到肉嘅歌，同時當我有愛情滋潤，我都會寫到啲好開心嘅歌。」不過，有時她翻閱自己以往的創作，難免會自覺當時很幼稚：「我每份創作都係我成長印記，我以前有首歌叫《愈痛愈愛》，我依家睇返我質疑自己當時到底我咩心理？點解會愈痛愈愛呢？到依家大個咗，我知道當遇到真愛時，先會活出最好嘅自己，唔會以為流得多眼淚就係愈愛對方！」