網民熱話：數無綫新四大小生優點！

無綫歷年嚟出產唔少靚仔又好戲嘅小生，好似之前喺劇集《陪著你走》化身「語速王」嘅陳豪，仲有馬國明、吳卓羲及黃宗澤等，不過佢哋已經愈嚟愈少出現喺電視，換嚟新一批小生接棒，而近日經常喺無綫劇擔正嘅陳展鵬、洪永城、蕭正楠及王浩信，就被網民推舉做新四大小生，唔少人都讚佢哋有演技同可塑性高！

陳展鵬恰到好處

喺無綫藝員訓練班出身嘅陳展鵬其後轉投亞視拍劇，多年嚟唔少人都覺得佢演技出眾，之後佢喺2008年重返無綫後好快就獲賞識，機會多多嘅佢喺多套劇中飾演重要角色，好似喺劇集《巨輪》、《單戀雙城》同《叛逃》等都擔正做男主角，無論演忠或奸角，抑或喺《單戀雙城》入面嘅詼諧角色陸恭梓，都恰到好處，而佢喺台慶劇《張保仔》仲一人分飾兩角，認真犀利，雖然有網民就話陳展鵬一唔戴佢副招牌眼鏡，個look就唔討好，不過亦有唔少人話佢戴唔戴眼鏡都咁型！

洪永城夠跳脫

由旅遊節目主持撈過界拍劇嘅洪永城（Tony）一向形象搞笑幽默，由喺《單戀雙城》入面飾演一路暗戀老友陳茵媺嘅戇直男，到依家喺《張保仔》做打得嘅海盜，都一樣難唔到Tony，網民仲話雖然佢唔係青靚白淨派，不過勝在夠跳脫，有網民更笑言佢對瞇瞇眼好煞食添！

蕭正楠劇接劇夠努力

至於由歌手轉去拍劇嘅蕭正楠，一直都努力由配角升到上主角之位，而同黃翠如公開戀情之後反而更旺蕭正楠，近年嚟仲劇接劇忙到冇停手，無論係《巨輪》嘅斯文男、《師奶MADAM》嗰個污wear警察定係古裝劇《倩女喜相逢》嘅搞笑角色，網民都覺得蕭正楠演技好好，仲唱得又睇得啊！

王浩信高大靚仔

而繼喺《名媛望族》入面被劉松仁掌摑13巴，兼攞埋飛躍進步男藝員獎，到之前喺《樓奴》入面擔正嘅王浩信，角色都令人眼前一亮，網民大讚佢除咗高大靚仔之外，演技更愈嚟愈進步，仲好期待佢挑戰唔同類型嘅角色添！

網民有話兒：

Herxxx_woxx：為咗睇展鵬同洪永城做戲，就算唔想見到陳凱琳都要追張保仔

kelvxx_kwxx：其實黃浩然比起佢地（哋）四個仲靚仔又有型

古XX：張繼聰做收規華做得幾好，有啲想佢攞視帝

cixxx_chax：陳展鵬好戲就公認嘅，蕭生，洪生同王浩信都月（愈）尼（嚟）月（愈）進步

大X樂：呢期佢地（哋）四個曝光率咁高，仲唔係四大小生