陳宛蔚港姐出身　100分女友收服錢國偉

現年33歲的陳宛蔚（Calinda）大家可能只係記得佢係Wilson嘅女友，其實佢曾於2007年參選香港小姐，其後落選嘅佢受賞識擔任無綫節目《味分高下》嘅味之天使「雜果賓治」而為人熟悉，雖然身材只有32B，但勝在勻稱惹火，佢之後亦有參與過唔少劇集如《怒火街頭2》、《雷霆掃毒》及電影《Laughing Gor之變節》，仲有份演出男友執導嘅電影《喜愛夜蒲2》，認真攞正牌邊拍拖邊工作！不過，Calinda最近淡出螢光幕，轉型做經理人嘅佢旗下藝人有「寸嘴Barbie」夏尉喻，佢仲入股到時裝店，升呢做老闆娘！

地下情終開花結果

Calinda於2007年參與無綫節目《味分高下》時，與當時負責監製節目嘅錢國偉（Wilson）結緣，二人其後傳出緋聞，仲多次甜蜜拍拖斷正，不過佢哋始終唔肯承認戀情，關係撲朔迷離。

二人拍拖多年，「女人緣」旺盛嘅Wilson與多位女藝人傳出緋聞，但每次都獲女友Calinda投以信任票，並話：「我都慣咗見佢（錢國偉）成日拖女。」認真一百分女友！貼心嘅Calinda仲喺Wilson進入事業低潮期時都依然不離不棄，難怪會將Wilson收服。上年7月，Wilson趁到美國做組合BIG FOUR演唱會時，向隨行嘅女友求婚，佢仲送上鮮花及三卡戒指，跪地求婚冧到佳人點頭答允，二人終於開花結果！