風流監製！錢國偉緋聞女友List畀你睇

緋聞多籮籮嘅導演錢國偉（Wilson），一直都多靚女「埋身」，不過呢位「風流監製」多年來唯一承認追求過無綫小花姚子羚，其他緋聞一概否認！

無綫小花組

無綫小花姚子羚（Elaine）入行後首部參演嘅電視劇，就係Wilson監製嘅劇集《當四葉草碰上劍尖時》，有指當時Wilson對Elaine好熱情而傳出緋聞，其後Wilson承認追求過佢，不過就唔成功。另外，Wilson仲同過藝人陳自瑤及楊秀惠等先後傳出緋聞，通通有份拍攝其監製嘅《四葉草》系列劇集，難怪佢會有「風流監製」之稱！

o靚妹組

Wilson監製嘅多個無綫節目，經常搵嚟一班美少女做助手，自然不時傳出緋聞。呢份緋聞女友名單除咗有節目《味分高下》嘅「味之天使」賈曉晨，仲有當時經常上載二人親密合照嘅藍莓（劉俐）等等。不過Wilson與女友陳宛蔚拍拖後開始修心養性，但佢於2012年喺新加坡拍攝節目時，被拍到與「神獸天使」白雲手拖手及共食一杯雪糕等親密舉動。

騎呢組

異性緣不俗嘅Wilson，估唔到同曾拍三級電影《3D肉蒲團之極樂寶鑑》、兼話題多多嘅內地「慾女」藍燕都傳過緋聞，真係桃花多到擋唔住！2010年，藍燕喺社交網站上載多張與男藝人嘅親密合照，當中有一張喺佢攬住Wilson咀嘴嘅相，有女友嘅Wilson即時劃清界線，並解釋：「我冇錫佢，係佢（藍燕）錫我咋……5、6年前影啦，佢好主動！」