林峯想低調結婚：結咗唔會即刻公布

藝人林峯出席馬場活動，他表示因有朋友是馬主，故間中亦會來臨馬場，並謂支持馬場慈善事務。問到有否做馬主的意念？他說：「要對馬匹再認識深啲，研究多啲先，未必係近期嘅事，或者會同人夾。」

談到有否留意黃曉明及Angelababy的億元婚禮，他表示：「有留意。（會唔會對女友吳千語都咁公主？）每個人對另一半或身邊嘅女朋友都係至高無上，但每個人鍾意嘅方式唔同，我哋崇尚低調，同屋企人分享，最緊要舒服。（即係唔出聲就結婚？）可能遲啲先講番，未必會第一時間公布同宣揚。（咁依家結咗未？）未結，我發誓（舉起3隻手指）。（爹哋有頭有面，係咪會擺豪門婚宴？）如果有呢一日，都係招呼親朋戚友。（擺好多個地方？）我相信屋企好開明，會畀我自主權，兩個人兩個家庭，自己閂埋門傾掂。」

撐千語bb冇公主病

繼而問到千語bb有沒有公主病？他即說：「梗係冇，佢好男仔性格。（你係佢王子？）你問番佢，我同佢哋（黃曉明及Angelababy）唔熟，baby同bb好熟，本身一早邀請佢做伴娘，但bb喺韓國拍緊嘢，劇組放唔到人，好可惜，但點都好，祝福佢哋。（你鎖定遲啲結婚搵邊個做伴郎未？）未諗咁詳細，搵錢先，做好工作先。」

讚陳國邦係演技派

問到可知無綫藝人陳國邦已離巢，與對方相熟嗎？他說：「都熟，同佢太太都熟，合作多年，我好欣賞佢嘅演技。（佢好似話心灰意冷唔續約！）唔知，一排冇聯絡，知佢做緊舞台劇有得發揮，佢絕對係演技派，我哋有傾過戲劇上嘅嘢，佢教我好多，相信佢追求到佢要嘅嘢。（但好似話佢上唔到位做主角！）我唔係好清楚情況，我覺得作為演員要搵到有發揮嘅角色，我以前都做過男二，唔係主角，但有發揮。（最有發揮係邊個角色？）我可唔可以話個個都有，自己搵嘅啫，如果角色冇發揮或挑戰都唔會接。（關菊英都走！）係咩，咁多，佢哋係中流砥柱，依家最缺乏嘅就係中間嗰一層演員，起到成套劇嘅作用，我走之前，知道佢哋一日走4個廠，要好好珍惜佢哋。（係咪話之後會出現斷層？）無論任何戲劇，功能演員好重要，對成套劇起咗作用，每個post都好重要，如果只係得主角係演唔到。」

「東網巨星」fb專頁：

以抵死角度，分析各大娛樂新聞，加埋識睇一定要睇嘅網民妙論，包保享盡「Fun」秒，快啲入嚟畀Like啦。