網民熱話：陳凱琳係喬寶寶後代？

一向畀人感覺「鬼鬼地」嘅前港姐陳凱琳，近日為劇集《張保仔》擔正做女主角。一直備受網民關注嘅佢，早前被指演技幼嫩，但原來網民對佢嘅「身世之謎」亦相當有興趣！擁一副深邃五官嘅佢，經常被誤以為係混血兒，點知事實上係正統香港人。今次，陳凱琳喺劇中嘅身世離奇，照劇情發展，理應係陳山聰嘅後代。不過，網民就作出另類推測，話陳凱琳個樣生得鬼鬼地，以基因角度嚟睇，佢應該係劇中喬寶寶嘅後代先啱喎！

劇中，喬寶寶一直暗戀黃智雯，而黃智雯則係陳凱琳嘅祖先。雖然劇中黃智雯同陳山聰係一對，但如果咁樣發展落去，網民就質疑陳凱琳嘅「鬼妹樣」基因到底係點得出嚟！有見及此，網民就創作出另類結局，就係喬寶寶有一日向黃智雯動色心，繼而向對方「下手」，所以就有咗陳凱琳呢個混血後代！有網民仲話：「黃帝妹個太公原來係喬寶寶，唔怪之得黃帝妹有陣咖喱味啦！陳山聰都算唔話得，食左（咗）隻死貓。」唔只咁，仲有人大讚編劇用心良苦：「原來編劇咁有心思，成套劇係個謎中謎！」

網民除咗劇中幫陳凱琳搵親生祖先外，仲喺現實中為佢搵咗個「失散姊妹」，就係無綫新聞記者利君雅！巴基斯坦裔嘅利君雅，憑純正廣東話，兼報新聞時淡定表現受到關注。唔少網民都認為陳凱琳與利君雅生得似樣，不過利君雅就比較皮膚黝黑，外表較文靜，相反陳凱琳則相對比較活潑有靈氣。不過，可能兩人「失散」後長期分開異地生活，所以氣質同膚色都出現差別，但唔少網民都表示衷心希望佢哋「重聚」呀！

網民有話兒：

meloxxxyyy：打死刀（都）唔信佢係陳山聰後人，打死刀（都）唔信佢唔係喬寶寶後人 !!!

wxxxtin2020：以為印度演員已打入香港市場

馬xxx好靚仔：加埋 利君雅 同 Michael Chugani 雙生雙旦，仲絕啦！

14xxx誠：有道理喎，編劇用心良苦

「東網巨星」fb專頁：

每日Keep住推介最「精」最「趣」娛聞，只需數分鐘，即可化身娛樂通，茶餘飯後唔驚冇話題。想加入熱議最hit最爆娛聞行列？呢個專頁真係不Like不可。

http://www.facebook.com/onccstars