林家棟J.Arie密密宣傳　唔認票房差

監製林家棟聯同導演梁國斌、藝人J.Arie和吳浣儀到電台宣傳電影《死開啲啦》，講到他們頻頻宣傳，可是因票房一般？對此家棟表示：「我哋套戲主要都係香港市場，唔關票房多寡事，一早都預咗不停宣傳，題材同人都係想畀新感覺觀眾，不過當然票房好啲就更好啦。（依家票房幾多？）未知呀，尋日啱啱先落機，不過口碑都非常好，導演同演員都有正面評價，希望佢哋將來有更多機會。（但宣傳咁密攰唔攰？）唔會攰，我哋都叫做半個吹神，同埋宣傳可以同觀眾互動，尤其是新人更需要面對觀眾。」而J.Arie亦謂跟劇組一起時十分有朝氣：「上年我覺得最開心，喺1月到3月同佢哋拍戲嗰陣，依家一齊宣傳就算一日走十單都好開心。」

而吳浣儀則謂最可惜港島區沒有戲院上映新戲：「我住港島，啲朋友又係住港島，好彩佢哋都肯過海睇。」家棟即笑言如果他們不肯過海支持就不是朋友。而梁國斌則謂電影為好演員提供平台演出：「上網見到好多人讚河國榮同浣儀姐做得好，香港其實有演員係得，但依家都係得一個電視台拍劇，如果我哋唔做，香港就會少咗兩個演員，其實好多得嘅演員都冇平台做。」吳浣儀亦謂希望票房可以節節上升，問到想票房去到多少萬？家棟即笑言：「要求都好低，淨係幾多萬？我冇諗過，不過我都冇壓力，見到評價正面都好開心，同埋成功挑戰自己，證明眼光都ok，對佢哋同手足全部交代到。」