衛蘭右腳包到成隻糉：醫生話我嚴重扭傷

歌手衞蘭（Janice）早前同孿生妹妹衛詩一齊加盟新公司，最近積極做運動再戰樂壇，尋晚佢喺微博留言自爆「拗柴」跌倒，搞到腳踝受傷，唔少網友都留言關心佢嘅傷勢。

Janice為免粉絲擔心，今日再次喺網上留言報告自己傷勢，佢上載咗右腳腳踝包紮嘅相，包到成隻糉咁，睇嚟傷勢唔輕！佢仲話：「尋日好唔小心跌親拗柴，醫生話我嚴重扭傷咗，呢幾日要好好休息，唔好郁咁多！」

事業心重嘅佢仲好擔心咁話可能要取消聽日喺廣州嘅活動，但一眾網友都叫佢身體緊要，勸佢暫時停工養傷！