陳展鵬睇好Bobby黎耀祥拎獎

藝人陳展鵬、陳凱琳、洪永城、傅嘉莉、黃智雯、陳山聰以及監製梁材遠等於觀塘出席《張保仔》結局飯，剛連任「新加坡視帝」的展鵬到場與眾演員慶功，獲一眾藝員開香檳為他慶祝，更有粉絲到場自費3席支持他，但由於要為新劇《城寨英雄》拍攝，展鵬只短短逗留一段時間。

展鵬難忘得獎，他說：「冇諗過會拎，今晚特別嚟慶祝，恭喜套劇有咁好成績。（年底台慶信心大咗？）每年都有信心，因為冇信心就會白白浪費投票畀我嘅人。因為一個角色好唔係自己功勞，係成個劇組功勞。（今晚有份請客？）有，同大家一齊請。（夾大份？）請晒都冇所謂，最緊要開心。」展鵬表示回港後收到不少好友恭賀，令他相當感動，但忙於拍攝劇集《城寨英雄》與《巨輪II》，他笑稱慶祝活動要排到12月中。

問到台慶睇好邊套劇獲獎？展鵬表示：「《梟雄》仲未播，希望《張》有好成績，知道黎耀祥會做大反派，好有爆炸力，而Bobby（歐陽震華）演技好，睇好佢哋兩個。（睇好自己？）一套劇要睇完整度，《梟》卡士好大，《張》係第一套咁多特技嘅劇，好有進步空間。」