郭藹明拒「夫妻檔」拍戲：咪令自己難受

劉青雲老婆郭藹明出席廚具活動時，透露平時有下廚習慣，無論中、西菜式也難不到她。她說：「甜品就少啲煮，因為青雲唔太食甜。會煮吓pasta、炆牛尾、檸檬雞等等。（青雲最鍾意邊道菜？）佢鍾意飲湯，所以一個星期都會煲三、四次湯。（佢會唔會煮番餐慰勞你？）佢會煮公仔麵，有時會自己整餃子，自己包，大家研究吓，煮吓飯仔。」

擔心拍戲會口齒不清

提到自從她與青雲「夫妻檔」上陣的廣告推出後，她明顯出席多了公開活動。她笑言：「咁啱啫，活動喺拍廣告之前已經接咗。（幾時復出拍戲？）因為我都好長時間冇喺幕前演出，差唔多八年定十年，我都擔心自己仲得唔得，講嘢會唔會口齒不清。我自己都擔心，（復出嘅話）一定要肯定樣樣都好先會考慮。（無綫有冇搵你？）冇。」

「夫妻檔」上陣有拗橇

問到假若邀請她「夫妻檔」拍戲，會否增加她的信心？她回應：「唔好啦，太熟唔係好事，佢可能會覺得『仲要照顧埋你？』。（劉嘉玲都話唔想夫妻檔，係咪真係咁唔好？）喺屋企又見，返工又見。喺屋企已經有嘢要互相遷就，工作又嚟。（易嗌交？）又唔會去到嗌交嘅，佢同我唔同，佢喺工作上有一定地位，我哋一齊工作佢梗係唔可以鬧我，不過可能佢心裏面想鬧我。唔好令佢難做，都唔好令自己難受。」

棄NASA職位？

另外，早前有指她當年為了青雲，放棄到美國太空總署（NASA）工作的機會。對於此傳聞，她澄清說：「其實唔係真嘅，唔知點解會有呢個傳聞。我係有做過實習工程師，不過唔係NASA，係另一間航天嘅私人公司。（做咗幾耐？）一年幾。（嗰時同青雲拍拖未？）未，嗰時未入行。（為咗青雲而唔返美國？）唔可以咁講，我有香港小姐名銜之後，都有工作要做。人哋（航天公司）都唔會留空個職位等我。」

「東網巨星」fb專頁：

以抵死角度，分析各大娛樂新聞，加埋識睇一定要睇嘅網民妙論，包保享盡「Fun」秒，快啲入嚟畀Like啦。

http://www.facebook.com/onccstars