網民熱話：戀人未滿《小幸運》揭翻唱潮

內地女星趙薇與「億萬小生」黃曉明大學時嘅曖昧關係一直被網民開玩笑，近日藝人黃翠如同洪永城嘅「戀人未滿」關係又成為熱話，睇嚟一班網民對呢類介乎朋友與戀人之間嘅關係都好有共鳴！

而最近台灣歌手Hebe（田馥甄）推出嘅歌曲《小幸運》，歌詞咁啱又講到兩個人只差一點點成為情侶，最後又唔能夠開花結果，當中幾句歌詞「原來我們和愛情曾經靠得那麼近～」、「與你相遇好幸運～可我已失去為你淚流滿面的權利～」更加成功將網民洗腦，歌曲點擊率至近3千萬！有網民仲製作出「一小時洗腦版小幸運」，將歌曲Loop足至少15次，不過都有唔少網民自願被洗腦，點擊率都有近3萬！

呢首歌咁Hit，唔怪得一班歌手都爭住翻唱呃吓Like！創作歌手糖妹就上載咗自彈自唱片段，點擊率都有5萬7千！佢放低平時樂天可人形象，一臉感觸唱出一字一句，相當投入。網民指佢係眾歌手中唱得最有感情，唔知糖妹心裏諗緊邊個呢？至於巨聲幫出身嘅譚嘉儀，更加用心製作，佢不但搵朋友幫手伴奏，仲拍埋個MV?！有網民就話佢唱得比較用力，但聲線甜笑，加上MV中有靚景，好襯歌詞意境，所以都值得加分！

雖然呢首歌原唱由女歌手演繹，但都有男歌手挑機！好似胡鴻鈞就為歌曲加點小意思，將《小幸運》Cossover嚴爵嘅《好的事情》，網民對呢個配搭都一致好評，仲話：「聽過最好聽的男版小幸運！」所以呢個版本都有6萬1千個點擊率，成績唔錯！至於歌手吳業坤就簡簡單單喺Facebook上載咗段自彈自唱片段，雖然片中唔見吳業坤個樣，仲要只係唱咗15秒。不過呢段唔夠半分鐘嘅片段都獲的好多粉絲支持，差唔多有4500個Like呀！

除咗吸引一班歌手翻唱，網絡上更有「隱世高手」出招，佢就填出廣東話版歌詞，一字一句道出青澀嘅戀情，加上主唱聲線悅耳，一班網民都一致讚好，點擊率都有1萬6千！睇嚟《小幸運》可算係新一代神曲，簡直係網民「呃Like」保證！

網民有話兒：

Appxxxaren：第二段開始，我聽到呆左。。真係好好聽

Benxxx：廣東話都係咁正！！！！好聽

YUExxxI CHENG：認真好聽　雖然無法超越原唱版本　但系（係）都唔錯！加油

Eumxxx Lim：詞寫得好好啊～

Manxxx：新一代神曲！

「東網巨星」fb專頁：

以抵死角度，分析各大娛樂新聞，加埋識睇一定要睇嘅網民妙論，包保享盡「Fun」秒，快啲入嚟畀Like啦。

http://www.facebook.com/onccstars